കൊടുവള്ളി: അടച്ചിട്ട വീടിൻ്റെ ജനൽ ഇളക്കി മാറ്റികവർച്ച. ഈസ്റ്റ് കിഴക്കോത്ത് ചാത്തൻ കുഴിമണ്ണിൽ ആലിയുടെ വീട്ടിലാണ് മോഷണം നടന്നത്. ഈ മാസം 13 ന് ആലിയും കുടുംബവും ചെന്നൈയിലേക്ക് പോയിരുന്നു. കഴിഞ്ഞ ദിവസം പുലർച്ചെ തിരിച്ചെത്തിയപ്പോഴാണ് മോഷണ വിവരം അറിയിയുന്നത്.
അടുക്കളയിലെ സ്റ്റോർ റൂമിൻ്റെ ചില്ല് തകർന്ന നിലയിൽ കണ്ടതിനെ തുടർന്ന് നടത്തിയ പരിശോധനയിലാണ് മോഷണം നടന്നതായി അറിയുന്നത്. സ്റ്റോർ റൂമിൻ്റെ ജനൽ ഇളക്കിമാറ്റിയാണ് മോഷ്ടാവ് അകത്തു കടന്നത്. തുടർന്ന് സ്റ്റോർ റൂമിൻ്റെ വാതിലിന്റെ ഒരു ചില്ല് തകർത്ത് വാതിൽ തുറന്നു. കിടപ്പു മുറിയിലെ അലമാരയിൽ സൂക്ഷിച്ചിരുന്ന അരപവൻ സ്വർണ്ണവും ഇരുപതിനായിരം രൂപയുമാണ് നഷ്ടപ്പെട്ടത്. മുക്കുപണ്ടങ്ങൾ പുറത്തെടുത്ത് വെച്ച നിലയിലാണ്. സ്റ്റോർ റൂമിന്റെ ജനലിലൂടെയാണ് മോഷ്ടാവ് രക്ഷപ്പെട്ടതും. കൊടുവള്ളി പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്