കോഴിക്കോട് :പ്രാവുകളെയും കൊക്കുകളെയും ദേശാടന പക്ഷികളെയും ഉൾപ്പെടെ ക്രൂരമായി പിടികൂടി കഴുത്തു ഞെരിച്ച് കൊന്ന് ചുട്ടു തിന്നുന്ന സംഘത്തിലെ മൂന്ന് പിടികൂടിയ സംഭവത്തിൽ കേസെടുക്കാൻ വകുപ്പില്ലെന്ന് അധികൃതർ.

പന്നിക്കോട് താമസിക്കുന്ന തമിഴ്‌നാട് സ്വദേശികളായ മണികണ്ഠൻ, രാജേഷ്, രവി എന്നിവരെയാണ് നാട്ടുകാർ പിടികൂടിയത്.

ഇവരെ അധികൃതർക്ക് കൈമാറിയെങ്കിലും നിയമ നടപടി സ്വീകരിക്കാൻ തടസങ്ങളുണ്ടെന്ന കാരണത്താൽ താക്കീത് ചെയ്ത് വിട്ടയക്കുകയായിരുന്നുവെന്ന് പ്രദേശവാസികൾ പറഞ്ഞു.

കൊടിയത്തൂർ പഞ്ചായത്തിലെ കാരകുറ്റി വയലിലാണ് ഇത്തരമൊരു ക്രൂരത അരങ്ങേറിയത്. പാടത്ത് കളിക്കാൻ എത്തിയവരാണ് നടക്കാൻ കഴിയാത്ത തരത്തിൽ പ്രാവുകളെ കണ്ടെത്തിയത്.

കണ്ണ് കുത്തിപ്പൊട്ടിച്ച നിലയിലും കാലുകളും ബന്ധിപ്പിച്ച നിലയിലുമാണ് പക്ഷികളെ കണ്ടെത്തിയതെന്ന് നാട്ടുകാർ പറഞ്ഞു. കഴിഞ്ഞ മൂന്ന് വർഷത്തോളമായി ഈ സംഘം ഇവിടെ നിന്ന് പക്ഷികളെ സമാന രീതിയിൽ പിടികൂടുന്നുണ്ടെന്നും നാട്ടുകാർ പറഞ്ഞു.

പിടികൂടുന്ന ഏതാനും പ്രാവുകളുടെ കണ്ണിൽ സൂചിയോ മറ്റു വസ്തുക്കളോ ഉപയോഗിച്ച് കുത്തിയിറക്കി കാഴ്ച ശക്തി ഇല്ലാതാക്കും. പിന്നീട് കാലുകൾ ബന്ധിച്ച് കൊയ്ത്ത് കഴിഞ്ഞ പാടത്ത് ഉപേക്ഷിക്കും.

ചുറ്റും വല വിരിക്കുകയും ചെയ്യും. പ്രാവുകളെ കണ്ട് ഇവിടേക്ക് എത്തുന്ന മറ്റ് പക്ഷികൾ ഈ കെണിയിൽപ്പെടുന്ന മുറക്ക് അവയെ പിടികൂടി കഴുത്തുഞെരിച്ച് കൊന്ന് ചാക്കിലാക്കി കൊണ്ടുപോകുന്നതാണ് ഇവരുടെ രീതി. പിന്നീട് ഇവയെ ഭക്ഷിക്കുമെന്ന് ചോദ്യം ചെയ്യലിൽ മൂന്ന് പേരും സമ്മതിച്ചതായും നാട്ടുകാർ പറഞ്ഞു.

വനംവകുപ്പിന്റെ സംരക്ഷിത പട്ടികയിൽ പ്രാവുകൾ ഉൾപ്പെടുന്നില്ല എന്നതിനാൽ നിയമനടപടികൾ സ്വീകരിക്കുന്നതിൽ തടസമുണ്ടെന്നാണ് ഫോറസ്റ്റ് ഉദ്യോഗസ്ഥർ പറയുന്നത്.

ഇവരിൽ നിന്ന് കണ്ടെത്തിയ പക്ഷികളെ പിടികൂടാൻ ഉപയോഗിക്കുന്ന ഉപകരണങ്ങൾ പൊലീസ് പിടികൂടി നശിപ്പിച്ചിട്ടുണ്ട്. ഇനി ഇത്തരത്തിലുള്ള ക്രൂരത നടത്താൻ അനുവദിക്കില്ലെന്നാണ് നാട്ടുകാർ പറയുന്നത്. പ്രതികൾക്ക് ഉചിതമായ ശിക്ഷ നൽകണമെന്നും നാട്ടുകാർ ആവശ്യപ്പെട്ടു.