ബൗളിങ്ങിൽ പഞ്ചാബിനെ എറിഞ്ഞിട്ട ഗുജറാത്ത് മികച്ച ബാറ്റിങ്ങും പുറത്തെടുത്തതോടെ 154 റൺസ് എന്ന വിജയലക്ഷ്യം ഒരുബോള് ബാക്കി നിൽക്കെ മറികടന്നു. ശുഭ്മാൻ ഗിൽ തിളങ്ങിയ മത്സരം ആറ് വിക്കറ്റിനാണ് ഗുജറാത്ത് കൈപ്പിടിയിലൊതുക്കിയത്. 49 പന്തിൽ 67 റൺസാണ് ഗിൽ അടിച്ചെടുത്തത്.

പഞ്ചാബ് ഉയർത്തിയ 153 എന്ന സ്‌കോർ ഈസിയായി മറികടക്കാമെന്ന ആത്മവിശ്വാസത്തിൽ തന്നെയാണ് ഗുജറാത്ത് പവർപ്ലെയിൽ ബാറ്റ് വീശിയത്. എന്നാൽ അഞ്ചാം ഓവറിൽ ടീം 48ൽ നിൽക്കെ 30 റൺസെടുത്ത വൃദ്ധിമാൻ സാഹ പുറത്തായി. തുടർന്ന് ക്രീസിലെത്തി സായി സുദർശനൊപ്പം ചേർന്ന് ഓപ്പണർ ഗിൽ റൺ അതിവേഗം ഉയർത്തി. എന്നാൽ 19 റൺസിന് സായി സുദർശൻ കളം വിട്ടു. അർഷദീപ് ആണ് സായിയെ പുറത്താക്കിയത്. ക്രീസിലെത്തിയ ഗുജറാത്ത് നായകൻ ഹർദിത് പാണ്ഡ്യ കളി ഏറ്റെടുക്കുമെന്നും ഗില്ലിനൊപ്പം ചേർന്ന് മികച്ച കൂട്ടുകെട്ടുണ്ടാക്കുമെന്ന് പ്രതീക്ഷിച്ചെങ്കിലും ഹർപ്രീത് ബ്രാർ വില്ലനായി. എട്ട് റൺസെടുത്ത ഹർദിക് പുറത്ത്. അവസാന ഓവറിലേക്ക് നീണ്ട മത്സരം ഒരുവേള കൈവിട്ടുപോവുമെന്ന് ഗുജറാത്ത് സംശയിച്ചു. സാം കരൻ ഗില്ലിനെ കൂടാരം കയറ്റി, വേണ്ടത് നാല് ബോളിൽ അഞ്ച് റൺസ്. കളി വീണ്ടും മുറുകി രണ്ട് ബോളിൽ വേണ്ടത് നാല് റൺസ് ക്രീസിൽ തിവാട്ടിയ. പന്ത് ബൗണ്ടറി കടത്തി മികച്ച ഫിനിഷറാണെന്ന് തിവാട്ടിയ വീണ്ടും തെളിയിച്ചു.

നേരത്തെ ബാറ്റ് ചെയ്ത പഞ്ചാബ് എട്ട് വിക്കറ്റ് നഷ്ടത്തിലാണ് 153 റൺസ് നേടിയത്. പഞ്ചാബിന്റെ ഒപ്പണർമർ കളിമറന്ന മത്സരത്തിൽ മധ്യനിരയും വാലറ്റവുമാണ് ടീമിന് ഭേദപ്പെട്ട സ്‌കോർ സമ്മാനിച്ചത്.കഴിഞ്ഞ മത്സരങ്ങളിൽ മികച്ച ഫോമിലുണ്ടായിരുന്ന ശിഖർ ധവാനിൽ തന്നെയായിരുന്നു പഞ്ചാബിന്റെ പ്രതീക്ഷ. എന്നാൽ കളിയുടെ തുടക്കത്തിൽ തന്നെ ഓപ്പണർ പ്രഭസിംറാൻ കൂടാരം കയറി. ടീം പൂജ്യത്തിൽ നിൽക്കവെയായിരുന്നു റാഷിദ് ഖാൻ ആദ്യവിക്കറ്റ് നേടുന്നത്. തൊട്ടുപിറകെ എട്ട് റൺസെടുത്ത് നിൽക്കെ ശിഖർ ധവാനും കളി മതിയാക്കി. തുടർന്ന് ക്രീസിലെത്തിയ മാത്യു ഷോർട്ടും രജപക്‌സയും റൺ പതുക്കെ ഉയർത്തി. എന്നാൽ 36 റൺസിൽ നിൽക്കെ ഷോർട്ട് പുറത്താവുമ്പോള് സ്‌കോർ 55-3,രജപക്‌സെയും ജിതേഷ് ശർമയും പതുക്കെ ബാറ്റ് വീശി. ബൗണ്ടറികൾ അകലെയായ മത്സരത്തിൽ സിംഗിളുകൾ മാത്രം പിറന്നു. 20 റൺസിന് രജപക്‌സെയും 25 റൺസിൽ ജിതേശ് ശർമയും വീണു. വാലറ്റത്ത സാം കരനും 22 റൺസെടുത്ത് കൂടാരം കയറി. പിന്നീട് ഷാരൂഖ് ഖാന്റെയും ഹർപീത് ബ്രാറിന്റെയും ഊഴമായിരുന്നു. റൺ ഇഴഞ്ഞ് മാത്രം നീങ്ങിയ മത്സത്തിൽ പന്ത് ബൌണ്ടറി കടത്തി ഷാരൂഖ് കളി അനുകൂലമാക്കി. ഒൻപത് പന്തിൽ നിന്ന് 22 റൺസാണ് ഷാരൂഖിന്റെ സംഭാവന. അവസാന ഓവറിൽ ഷാരൂഖ് ഖാനും റണ്ണൗട്ടിലൂടെ കളം വിട്ടു. ഒരു റൺസ് എടുത്ത് റിഷി ധവാനും പുറത്തതോടെ പഞ്ചാബിന്റെ ഇന്നിങ്‌സ് എട്ട് വിക്കറ്റ് നഷ്ടത്തിൽ 153 റൺസിന് അവസാനിച്ചു.

നാല് ഓവറിൽ 18 റൺസ് മാത്രം വഴങ്ങി രണ്ട് വിക്കറ്റ് നേടി മോഹിത് ശർമയ ഗുജറാത്തിന് കളി അനുകൂലമാക്കിയത്. മുഹമ്മദ് ഷമി, ജോഷ്വ ലിറ്റിൽ, അൽസാരി ജോസഫ്, റാഷിദ് ഖാൻ എന്നിവർ ഓരോ വിക്കറ്റ് വീതം വീഴ്ത്തി. ടോസ് നേടിയ ഗുജറാത്ത് ബൗളിങ് തെരഞ്ഞെടുക്കുകയായിരുന്നു.