പാരീസ് :ഒളിംപിക്സ് ഹോക്കിയിൽ ഇന്ത്യക്ക് ചരിത്ര വിജയം. 52 വർഷങ്ങൾക്ക് ശേഷം ഇന്ത്യ ഓസ്ട്രേലിയയെ തോൽപ്പിച്ചു.

ഗ്രൂപ്പ് ഘട്ടത്തിലെ അവസാന മത്സരത്തിൽ രണ്ടിനെതിരെ മൂന്ന് ഗോളുകൾക്കായിരുന്നു ഇന്ത്യയുടെ ജയം. ഹർമൻപ്രീത് സിംഗിന്റെ ഇരട്ട ഗോളുകളാണ് ഇന്ത്യയെ സഹായിച്ചത്.

ഒരെണ്ണം അഭിഷേകിന്റെ വകയായിരുന്നു. തോമസ് ക്രെയ്ഗ്, ബ്ലേക്ക് ഗോവേഴ്സ് എന്നിവരാണ് ഓസ്ട്രേലിയയുടെ ഗോളുകൾ നേടിയത്. ഗ്രൂപ്പിലെ അഞ്ച് മത്സരങ്ങളും പൂർത്തിയാക്കിയ ഇന്ത്യ 10 പോയിന്റുമായി രണ്ടാം സ്ഥാനത്താണ്ഇന്ന് അർജന്റീന, ബെൽജിയത്തിനെതിരെ പരാജയപ്പെട്ടാൽ ഇന്ത്യ രണ്ടാം സ്ഥാനം നിലനിർത്താം. ആദ്യ ക്വാർട്ടറിൽ തന്നെ ഇന്ത്യ രണ്ട് ഗോളിന്റെ ലീഡെടുത്തിരുന്നു. 12-ാം മിനിറ്റിലായിരുന്നു ആദ്യ ഗോൾ. ഒരു കൗണ്ടർ അറ്റാക്കിൽ നിന്നാണ് ഗോൾ പിറന്നത്.

ലളിത് ഉപാധ്യായയുടെ പാസിൽ നിന്ന് അഭിഷേക് അനായാസം ലക്ഷ്യം കണ്ടു. തൊട്ടടുത്ത മിനിറ്റിൽ രണ്ടാം ഗോളും പിറന്നു. ഇത്തവണ ഹർമൻപ്രീത് പെനാൽറ്റി കോർണർ ഗോളാക്കി മാറ്റി. എന്നാൽ 25-ാം മിനിറ്റിൽ ഓസ്ട്രേലിയ ഒരു ഗോൾ തിരിച്ചടിച്ചു.ഗോവേഴ്സിന്റെ ആദ്യ ശ്രമം മൻപ്രീത് പ്രതിരോധിച്ചെങ്കിലും റീ ബൗണ്ടിൽ ക്രെയ്ഗ് ലക്ഷ്യം കണ്ടു. 32-ാം മിനിറ്റിൽ ഹർമൻപ്രീത് വിജയമുറപ്പിച്ച ഗോൾ നേടി. പാരീസ് ഒളിംപിക്സിൽ താരത്തിന്റെ ആറാം ഗോളായിരുന്നിത്.

മത്സരം അവസാനിക്കാൻ അഞ്ച് മിനിറ്റ് മാത്രം ബാക്കിയുള്ളപ്പോഴാണ് ഗോവേഴ്സ് പെനാൽറ്റി ഫ്ളിക്കിലൂടെ ഓസീസിന്റെ രണ്ടാം ഗോൾ നേടുന്നത്. അതേസമയം, ഷൂട്ടിംഗിൽ ഇന്ത്യൻ താരം മനു ഭാകർ മൂന്നാം മെഡലിനരികിലാണ്.വനിതകളുടെ 25 മീറ്റർ എയർ പിസ്റ്റളിൽ താരം ഫൈനലിൽ കടന്നു. രണ്ടാം സ്ഥാനത്താണ് താരം യോഗ്യതാ റൗണ്ട് അവസാനിപ്പിച്ചത്. 590 പോയിൻ്റ് താരം സ്വന്തമാക്കി. നേരത്തെ രണ്ട് വെങ്കലങ്ങൾ താരം സ്വന്തമാക്കിയിരുന്നു.

10 മീറ്റർ എയർ പിസ്റ്റൾ വ്യക്തിഗത ഇനത്തിലും മിക്സ്ഡ് ടീം ഇനത്തിലുമാണ് ഭാകർ വെങ്കലം നേടിയത്. അമ്പെയ്ത്തിൽ മിക്സ്ഡ് വിഭാഗത്തിൽ ക്വാർട്ടർ ഫൈനലിലെത്താനും ഇന്ത്യക്ക് സാധിച്ചു. ഇന്തോനേഷ്യക്കെതിരെ 5- 1നായിരുന്നു ഇന്ത്യയുടെ ജയം.