ദുബൈ: യുഎഇയുടെ ദേശീയ തിരിച്ചറിയൽ കാർഡായ എമിറേറ്റ്സ് ഐഡിയുടെ ഒറിജിനൽ കയ്യിലില്ലെന്ന കാരണത്താൽ തിരു വനന്തപുരം സ്വദേശിയുടെ യാത്ര തടഞ്ഞ് എയർ ഇന്ത്യ എക്സ്പ്രസ്. ലീവിന് നാട്ടിലേക്ക് പോയി തിരിച്ചു വരികയായിരുന്ന തിരുവനന്തപുരം പുല്ലുവിള സ്വദേശി ബൈസിലിന്റെ യാത്രയാണ് എമിറേറ്റ്സ് ഐ ഡിയില്ലെന്ന കാരണത്താൽ തിരുവനന്തപുരം വിമാനത്താവളത്തിൽ എയർ ഇന്ത്യ അധികൃതർ തടഞ്ഞത്. പാസ്പ്പോർട്ടിലും മൊബൈൽ ആപ്പിലും വിസയും എമിറേറ്റ്സ് ഐഡിയും ബൈസിൽ വിമാന അധികൃതരെ കാണിച്ചു കൊടുത്തെങ്കിലും സ്വീകരിക്കാൻ ജീവനക്കാർ കൂട്ടാക്കിയില്ല. വിമാന യാത്ര മുടങ്ങുന്നത് കാരണം നിരവധി തവണ അധികൃതരോട് കേണപേക്ഷിച്ചെങ്കിലും ഇതൊന്നും ജീവനക്കാർ കൂട്ടാക്കിയില്ല.
ദുബൈയിലെ സ്വകാര്യ കമ്പനിയിൽ ജോലി ചെയ്യുന്ന ബൈസിൽ ഒരു മാസം മുമ്പാണ് ലീവിൽ നാട്ടിലേക്ക് പോയത്. യൂ എ ഇയിൽ എല്ലാ കാർഡുകളും മൊബൈൽ ആപ്പിൽ ഡിജിറ്റലായി ലഭിക്കുന്നത് കാരണം നിലവിൽ ആരും ഇവ കയ്യിൽ കുരുതാറില്ല. കഴിഞ്ഞ കുറച്ചു മാസങ്ങളായി യു എഇയിൽ വിസയും പാസ്പോർട്ടിൽ പതിക്കുന്നില്ല.
പാസ്സ്പോർട്ടിലെ കാലാവധിയുള്ള വിസയും യു എ ഇ സർക്കാരിൻ്റെ ഔദ്യോഗിക വെബ് സൈറ്റ് തുറന്ന് എമിറേറ്റ്സ് ഐഡിയും കാണിച്ചു കൊടുത്തെങ്കിലും അധികൃതർ യാത്രക്ക് അനുമതി നൽകിയില്ലെന്ന് ബൈസിൽ മാധ്യമങ്ങളോട് പറഞ്ഞു. സംസാരിക്കാൻ പോലും ജീവനക്കാർ തയ്യാറായില്ല. ജോലിയിൽ പ്രവേശിക്കേണ്ട അവസാന ദിവസം ഒക്ടോബർ നാല് ആയതിനാൽ കമ്പനി ആവശ്യപ്രകാരം ഒരു വെള്ള പേപ്പറിൽ യാത്ര റദ്ദ് ചെയ്യാനുള്ള കാരണം എഴുതി നൽകാൻ അപേക്ഷിച്ചെങ്കിലും അതിനും ജീവനക്കാർ തയ്യാറായില്ല. ദുബൈ എയർ ഇന്ത്യ എക്സ്പ്രസ് ഓഫീസിൽ വിവരം ധരിപ്പിച്ചപ്പോൾ പാസ്സ്പോർട്ടിൽ കാലാവധിയുള്ള റെസിഡൻസി പെർമിറ്റ് ഉള്ളത് കാരണം യാത്ര ചെയ്യാൻ തടസ്സമില്ലെന്നാണ് അറിയാൻ കഴിഞ്ഞതെന്നും ബൈസിൽ പറഞ്ഞു