കോഴിക്കോട്: മദ്രസ ബോർഡുകള്‍ പിരിച്ചുവിടണമെന്നും മദ്രസകള്‍ക്ക് സംസ്ഥാന സർക്കാരുകള്‍ നല്‍കുന്ന ധനസഹായം നിർത്തലാക്കണം എന്നുമുള്ള ദേശീയ ബാലാവകാശ കമ്മീഷന്റെ നിർദ്ദേശത്തിനെതിരെ പ്രതിഷേധം ഉയരുന്നു.
മദ്രസകള്‍ പൂർണ്ണമായും അടച്ചു പൂട്ടാനുള്ള നീക്കത്തിന്റെ ഭാഗമാണ് ബാലാവകാശ കമ്മീഷന്റെ നിർദ്ദേശമെന്നാണ് മതസംഘടനകള്‍ ചൂണ്ടിക്കാട്ടുന്നത്.
ദേശീയ ബാലാവകാശ കമ്മീഷന്റെ നിർദ്ദേശം സംഘപരിവാരിന്റെ അജണ്ടയെന്ന് മുസ്ലിം ലീഗ് വിലയിരുത്തി. പരസ്യപ്രതിഷേധത്തിനൊപ്പം നിയമപോരാട്ടവും നടത്താനുള്ള നീക്കം തുടങ്ങും. നിർദ്ദേശങ്ങള്‍ ഭരണഘടനാ വിരുദ്ധമാണെന്ന് ഐഎൻഎല്‍ പ്രതികരിച്ചു. അതേസമയം, ദേശീയ ബാലാവകാശ കമ്മീഷന്റെ നിർദ്ദേശം കേരളത്തിലെ മദ്രസകളെ ബാധിക്കില്ലെങ്കിലും മൗലികാവകാശ ലംഘനമെന്ന പേരില്‍ ദേശീയ തലത്തില്‍ ഉയരുന്ന പ്രതിഷേധത്തില്‍ പങ്ക് ചേരാനാണ് കേരളത്തിലെ മുസ്ലീം സംഘടനകളുടെ തീരുമാനം.
ഉത്തരേന്ത്യയിലെ പല സംസ്ഥാനങ്ങളിലും മദ്രസ നടത്തിപ്പിന് സർക്കാർ ധനസഹായമുണ്ടെങ്കിലും കേരളത്തില്‍ മദ്രസാ വിദ്യാഭ്യാസ ബോർഡോ സർക്കാർ സാമ്ബത്തിക സഹായമോ ഇല്ല. അതിനാല്‍ ദേശീയ ബാലാവകാശകമ്മീഷന്റെ നിർദ്ദേശം ഇവിടെ കാര്യമായി ബാധിക്കില്ല. ഇവിടെ മുജാഹിദ്, സുന്നി, ജമാഅത്ത് ഇസ്ലാമി വിഭാഗങ്ങള്‍ പ്രത്യേകം പ്രത്യേകമായി മദ്രസകള്‍ നടത്തുന്നുണ്ട്. സ്കൂള്‍ വിദ്യാഭ്യാഭ്യാസത്തെ ബാധിക്കാതെ രാവിലെയും വൈകിട്ടുമായാണ് ക്ലാസുകള്‍. അതിന്റെ പേരില്‍ ഔപചാരികവിദ്യാഭ്യാസം ആരും വേണ്ടെന്ന് വെക്കുന്നുമില്ല.
കമ്മീഷന്റെ നിർദ്ദേശത്തില്‍ കേരളത്തിലെ മദ്രസകളെക്കുറിച്ചും പരാമർശമുള്ളതും ഗൗരവമുള്ള വിഷയമാണ്. എന്നാല്‍ ഉത്തരേന്ത്യയിലെ പോലെയല്ല കേരളത്തിലെ സംവിധാനം. ഇവിടെ മുഴുസമയ മദ്രസാ പഠനം പൊതുവെ ഇല്ലെന്ന് മാത്രമല്ല മത പഠന കേന്ദ്രങ്ങള്‍ ഔപചാരിക വിദ്യാഭ്യാസവും ഇന്നത വിദ്യാഭ്യവും നല്‍കുന്നുണ്ട്. പക്ഷേ ദേശീയ തലത്തില്‍ ന്യൂനപക്ഷത്തെ ലക്ഷ്യമിട്ട് നടത്തുന്ന നീക്കമായതിനാല്‍ പിന്തുണയുമായി പ്രതിഷേധം ഇവിടെയും ഉയരും.