കോഴിക്കോട്: ഐസ് പാക്ക് ചെയ്യുന്നതിനിടെ ജീവനക്കാരൻ രുചിച്ചു നോക്കുന്ന ദൃശ്യം പുറത്തായതോടെ സ്ഥാപനത്തിലെ ഉപകരണങ്ങളുമായി രക്ഷപ്പെടാനുള്ള ശ്രമം നാട്ടുകാർ തടഞ്ഞു. കോഴിക്കോട് എളേറ്റിൽ വട്ടോളി - ഇയ്യാട് റോഡിൽ പ്രവർത്തിക്കുന്ന 'ഐസ് - മി' എന്ന സ്ഥാപനത്തിലാണ് വിവാദ സംഭവങ്ങൾ ഉണ്ടായത്.

ഇന്നലെ രാത്രിയിലായിരുന്നു സംഭവം. പാക്കിംഗിനെടുക്കുന്ന ഐസുകൾ രുചിച്ചു നോക്കി പാക്ക് ചെയ്യുന്ന ദൃശ്യങ്ങളാണ് പുറത്തുവന്നത്. കുട്ടികൾക്ക് വേണ്ടി ഐസ് വാങ്ങാൻ എത്തിയ മങ്ങാട് സ്വദേശി സജിത്താണ് ഇത് കണ്ടത്. മൊബൈൽ ഫോണിൽ ഇതിൻ്റെ ദൃശ്യങ്ങൾ പകർത്തിയ സജിത്ത് പിന്നീട് സമൂഹ മാധ്യമങ്ങളിൽ പങ്കുവെയ്ക്കുകയായിരുന്നു.

.ദൃശ്യം സമൂഹ
മാധ്യമങ്ങളിലൂടെ അതിവേഗം
പ്രചരിച്ചതോടെ സ്ഥാപന ഉടമ നടപടി
ഭയന്ന് രക്ഷപ്പെടാൻ ശ്രമിക്കുകയായിരുന്നു.

ഇവിടെയുണ്ടായിരുന്ന ഉപകരണങ്ങളും
മറ്റുമായി രാത്രി തന്നെ കാറിൽ പോകാനുള്ള ശ്രമം നാട്ടുകാർ ചേർന്ന്
തടയുകയും പൊലീസിൽ വിവരം
അറിയിക്കുകയും ചെയ്തു.കൊടുവള്ളി പൊലീസ് സ്ഥലത്തെത്തി കാറിൽ കയറ്റിയ സാധങ്ങളെല്ലാം തിരികെ കടയ്ക്കുള്ളിൽ വെപ്പിക്കുകയും കാർ കസ്റ്റഡിയിൽ എടുത്ത് കട സീൽ ചെയ്യുകയും ചെയ്തു. തുടർ നടപടികൾക്കായി പൊലീസ് ആരോഗ്യ വകുപ്പിനെ ബന്ധപ്പെട്ടിട്ടുണ്ട്. ജില്ലയിൽ മഞ്ഞപ്പിത്തം ഉൾപ്പെടെ പടരുന്ന സാഹചര്യത്തിൽ സ്ഥാപനത്തിൽ നിന്നുള്ള ദൃശ്യങ്ങൾ ജനങ്ങളെ ആശങ്കയിലാക്കിയിട്ടുണ്ട്.

സ്ഥാപനത്തിനെതിരെ ശക്തമായ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.