മാവൂർ :ഭാഷയെ വിശ്വസാഹിത്യത്തിലേക്ക്
കൈപിടിച്ച അക്ഷര ഇതിഹാസം മലയാളത്തിന്റെ എം.ടി വാസുദേവൻ നായർക്ക് വിട നൽകി അമ്മ മലയാളം.
സംസ്കാരച്ചടങ്ങുകൾ ഔദ്യോഗിക ബഹുമതികളോടെ മാവൂർ റോഡ് ശ്മശാനത്തിൽ പൂർത്തിയായി.

രണ്ടാമൂഴമില്ലാത്ത കാലത്തേയ്ക്ക്
യാത്രയായ എഴുത്തിൻ്റെ പെരുന്തച്ചനെ അവസാനമായി ഒരുനോക്ക് കാണാൻ ആയിരങ്ങളാണ് നിളാപ്രവാഹം പോലെ
ഒഴുകിയെത്തിയത്.

സുഹൃത്തുക്കളും
സഹപ്രവർത്തകരും ജനപ്രതിനിധികളുംഎംടിയുടെ വാക്കുകൾ കടമെടുത്താൽ മരണവുമായി സന്ധി പറഞ്ഞ ഇടവേള മാത്രമാണ് ജീവിതം. സാർഥകവും സർഗസമ്പന്നവുമായ ആ ഇടവേള പൂർത്തിയാക്കി ഇതിഹാസം അനശ്വരതയിലേയ്ക്ക്. വാക്കിന്റെ മഹാമൗനം സിതാരയെ പൊതിഞ്ഞപ്പോൾ സാംസ്ക്കാരിക കേരളം തേങ്ങി. രോഗശയ്യയിൽ നിന്ന് എം.ടിയുടെ മടങ്ങിവരവ് ഇന്നലെ രാത്രി പത്തുവരെ കൊട്ടാരം റോഡിലെ സിതാര എന്ന വീടും ഓരോ മലയാളിയും ആഗ്രഹിച്ചു. പക്ഷെ, പ്രാർഥനകൾ വിഫലമായി. അവസാന യാത്രയ്ക്കായി മലയാളത്തിന്റെ സാഹിത്യ സുകൃതം ഒരിക്കൽകൂടി സിതാരയുടെ പടികടന്നെത്തി.
ചേതനയറ്റ്. 'വാസുവേട്ടാ' എന്ന
വിളിയോടെ ജീവിത പങ്കാളി സരസ്വതി
ടീച്ചർ വിങ്ങിപ്പൊട്ടി. കരഞ്ഞുകലങ്ങി
മകൾ അശ്വതിയും ബന്ധുക്കളും.സദയവും താഴ്വാരവും അടക്കം
എംടിയുടെ മികവുറ്റ രചനകളിലൂടെ
അഭിനയത്തിന്റെ വിസ്മയക്കാഴ്ച്ചകൾ
ഒരുക്കിയ മോഹൻലാൽ പുലർച്ചെയ്ക്ക് മുൻപേ അന്തിമോപചാരം
അർപ്പിക്കാനെത്തി. വാക്കിന്റെ വിരാട്
പുരുഷനുമുന്നിൽ
അഞ്ജലീബദ്ധനായി.

നേരം പുലരാൻ
തുടങ്ങിയതോടെ നിളയിലെ മൺതരികൾപോലെ, ഉള്ളിൽ അടക്കിപ്പിടിച്ച തേങ്ങലിന്റെ
പ്രവാഹവുമായി മനുഷ്യർ സിതാരയിലേയ്ക്ക്. ആൾക്കൂട്ടത്തിൽ
തനിയെ നിന്ന് ഏകാകികളുടെശബ്ദമായവന് കാഥികന്റെ പണിപ്പുരയിലെത്തി നാടിന്റെ നിശബ്ദമായ യാത്രമൊഴി.

പരിണയവും പഞ്ചാഗ്നിയും അടക്കം എം.ടിയുടെ തിരക്കഥാ ക്ലാസിക്കുകൾക്ക് മികവുറ്റ കാഴ്ച്ചകളുടെ നല്ലപാതിയായ സുഹൃത്ത് ഹരിഹരൻ ഹൃദയം നുറുങ്ങുന്ന വേദനയോടെ വിട നൽകി. മുഖ്യമന്ത്രി പിണറായി വിജയനും മന്ത്രിമാരും സാഹിത്യസാംസ്ക്‌കാരികരംഗത്തെ പല തലമുറകളിൽപ്പെട്ടവരും അന്ത്യാഭിവാദ്യം അർപ്പിച്ചു. എംടിയുടെ കഥാപാത്രങ്ങളായി പകർന്നാടിയവരുടെ കണ്ണീരിൽ കുതിർന്ന പ്രണാമം.ആത്മനൊമ്പരങ്ങളുടെ കടവിൽ അക്ഷരങ്ങളുടെ കാതൽ കടഞ്ഞെടുത്ത് സാഹിത്യത്തിൻ്റെ നാലുകെട്ട് പണിത് അതിൽ വാക്കിന്റെ തീർച്ചയും മൂർച്ചയുമുള്ള പള്ളിവാളും കാൽച്ചിലമ്പും പ്രതിഷ്ഠിച്ച എഴുത്തിന്റെ ഈ പെരുന്തച്ചനെ സമ്മാനിച്ചതിന് കാലമേ നന്ദി. വിശ്വസാഹിത്യത്തിൽ ഇടംനേടിയ വീരഗാഥയുടെ കാൽക്കൽ കണ്ണാന്തളിപ്പൂക്കൾ അർപ്പിക്കുന്നു. എംടിയെക്കുറിച്ച് എംടി തന്നെ പറഞ്ഞത് ഇങ്ങിനെ "തെറ്റുകളും ശരികളുമൊക്കെയുള്ള ശരാശരി മനുഷ്യൻ. ദേവനല്ല; ചെകുത്താനുമല്ല'.