എഡിൻബറോ: യുകെയിൽ നിന്ന് കാണാതായ മലയാളി വിദ്യാർത്ഥിനിയെ മരിച്ച നിലയിൽ കണ്ടെത്തി. ഹെരിയോട്ട് വാട്ട് യൂണിവേഴ്സിറ്റി വിദ്യാർത്ഥിനിയും കൊച്ചി പെരുമ്പാവൂർ സ്വദേശിനിയുമായ സാന്ദ്ര സജുവിനെ(22)യാണ് മരിച്ച നിലയിൽ കണ്ടെത്തിയത്. എഡിൻബറോയ്ക്ക് സമീപം ന്യൂബ്രിഡ്‌ജിലെ ആൽമണ്ട് നദിയുടെ കൈവഴിയിൽ നിന്ന് സാന്ദ്രയുടെ മൃതദേഹം കണ്ടെത്തുകയായിരുന്നു.ആഴ്ചകൾക്ക് മുൻപായിരുന്നു സാന്ദ്രയെ കാണാതായത്. ലിവിങ്സ്റ്റണിലെ ആൽമണ്ട്വെയിലിലെ അദ്ന സൂപ്പർമാർക്കറ്റിന് മുന്നിലെത്തിയ സാന്ദ്രയുടെ സിസിടിവി ദൃശ്യം നേരത്തേ പൊലീസിന് ലഭിച്ചിരുന്നു. ഇതോടെ സാന്ദ്രയെ ഏത്രയും വേഗം കണ്ടെത്താൻ കഴിയുമെന്ന പ്രതീക്ഷയിലായിരുന്നു അന്വേഷണ സംഘം. അന്വേഷണം പുരോഗമിക്കുന്നതിനിടെ ആൽമണ്ട് നദിയിൽ നിന്ന് മൃതദേഹം കണ്ടെത്തുകയും ഇത് സാന്ദ്രയുടേതാണെന്ന് തിരിച്ചറിയുകയുമായിരുന്നു.

സാന്ദ്രയുടെ മരണത്തിൽ ദുരൂഹതയുണ്ടോ എന്ന കാര്യം വിശദമായി അന്വേഷിക്കാനാണ് പൊലീസിന്റെ തീരുമാനം. കഴിഞ്ഞ വർഷമായിരുന്നു വിദ്യാർത്ഥി വിസയിൽ സാന്ദ്ര യുകെയിൽ എത്തിയത്.