കൊല്ലം:കൊല്ലം കുണ്ടറ ഇരട്ടക്കൊലക്കേസ് പ്രതി പിടിയിൽ. അമ്മയെയും
മുത്തച്ഛനെയും കൊലപ്പെടുത്തിയ കേസിലെ പ്രതി പടപ്പക്കര സ്വദേശി അഖിലാണ് ശ്രീനഗറിൽ നിന്ന് പിടിയിലായിരിക്കുന്നത്.
കൊലപാതകത്തിന് ശേഷം ഒളിവിൽ പോയ പ്രതിയെ നാല് മാസത്തെ അന്വേഷണത്തിനൊടുവിലാണ് കുണ്ടറ സി ഐ വി. അനിൽകുമാറിന്റെ നേതൃത്വത്തിലുള്ള സംഘം പിടികൂടിയത്.

ശ്രീനഗറിലെ ഒരു വീട്ടിൽ ജോലിക്കാരനായി ഒളിവിൽ കഴിയുകയായിരുന്നു അഖിൽ. കേസിന്റെ അന്വേഷണത്തിൽ പല തരത്തിലുള്ള പ്രതിസന്ധികളാണ് പൊലീസിന് നേരിടേണ്ടി വന്നിരുന്നത്.കാരണം സ്ഥിരമായി മൊബൈൽ ഫോൺ ഉപയോഗിക്കുന്ന ആളായിരുന്നില്ല പ്രതി.

ആകെയുണ്ടായിരുന്ന ഫോണും സിം കാർഡും നശിപ്പിച്ചിരുന്നു. സുഹൃത്തുക്കളെ ബന്ധപ്പെടുന്നതും സമൂഹമാധ്യമങ്ങൾ ഉപയോഗിക്കുന്നതും ഒഴിവാക്കിയിരുന്നു.

പ്രതിയിലേക്കെത്താനുള്ള വഴികൾ വളരെ കുറവായിരുന്നു. എന്നാൽ കേരളത്തിലുടനീളം കുണ്ടറ പൊലീസ് അന്വേഷണം വ്യാപിപ്പിച്ചിരുന്നു. പല സംസ്ഥാനങ്ങളിലും പ്രതിയെക്കുറിച്ചുള്ള വിവരങ്ങളും പൊലീസ് കൈമാറിയിരുന്നു.അങ്ങനെയാണ് ശ്രീനഗറിൽ നിന്നും പ്രതിയെക്കുറിച്ചുളള വിവരം കുണ്ടറ പൊലീസിന് ലഭിക്കുന്നത്. കുണ്ടറ സിഐ അനിൽകുമാറിന്റെ നേതൃത്വത്തിലുള്ള മൂന്നംഗ സംഘം ശ്രീനഗറിലേക്ക് പുറപ്പെടുകയായിരുന്നു.

ഇവിടെ നടത്തിയ അന്വേഷണത്തിനൊടുവിലാണ് പ്രതിയെ പിടികൂടുന്നത്.
പ്രതിയെക്കുറിച്ചുള്ള നിർണായകവിവരം നൽകിയത് ശ്രീനഗറിൽ തന്നെയുള്ള മലയാളിയായിരുന്നു. ക്രിമിനൽ പശ്ചാത്തലത്തിലുള്ള ഒരാളാണ് തങ്ങളുടെ വീട്ടിൽ ജോലിക്ക് നിൽക്കുന്നതെന്ന കാര്യം വീട്ടുകാർക്ക് അറിയില്ലായിരുന്നു.