കോഴിക്കോട് : നാദാപുരം വളയത്ത് വിവാഹാഘോഷത്തിനിടെ അപകടകരമായി കാറുകളോടിച്ചുള്ള റീൽസ് ചിത്രീകരണത്തിൽ നവവരൻ ഉൾപ്പെടെയുള്ളവർക്കെതിരെ പൊലീസ് കേസ്. വരൻ കല്ലാച്ചി സ്വദേശി അർഷാദ് കൂടെയുണ്ടായിരുന്ന മറ്റ് യുവാക്കൾ എന്നിവർക്കെതിരെയാണ് വളയം പൊലീസ് കേസെടുത്തത്.

കഴിഞ്ഞ ദിവസമാണ് കോഴിക്കോട് നാദാപുരം വളയത്ത് വിവാഹപ്പാർട്ടി നടുറോഡിൽ നടത്തിയ വാഹനാഭ്യാസ റീൽസ് സമൂഹമാധ്യമങ്ങളിൽ പ്രചരിച്ചത്. മൂന്ന് കിലോമീറ്ററോളം ദൂരം കാറുകളുടെ ഡോറിൽ ഇരുന്നും റോഡിൽ പടക്കം പൊട്ടിച്ചും പൂത്തിരി കത്തിച്ചുമായിരുന്നു ആഡംബര വാഹനങ്ങളിലെ അഭ്യാസപ്രകടനങ്ങൾ. പിന്നിൽ നിന്നും വന്ന ഒരു വാഹനത്തെയും ഇതിനിടയിൽ കടന്നുപോകാനും അനുവദിച്ചില്ല. നവവരനും ഈ പരിപാടികളിൽസജീവമായി രംഗത്തുണ്ടായിരുന്നതും ദൃശ്യങ്ങളിലുണ്ട്.

വരൻ കല്ലാച്ചി സ്വദേശി അർഷാദ് കൂടെയുണ്ടായിരുന്ന മറ്റ് യുവാക്കൾ എന്നിവർക്കെതിരെയാണ് വളയം പൊലീസ് കേസെടുത്തത്. അപകടകരമായി വാഹനം ഓടിക്കൽ, പൊതുഗതാഗതം തടസപ്പെടുത്തൽ തുടങ്ങി സ്റ്റേഷൻ ജാമ്യം കിട്ടാവുന്ന വകുപ്പുകൾ പ്രകാരമാണ് കേസ്. പൊലീസ് സ്റ്റേഷനിൽ ഹാജരാകാൻ ഇവർക്ക് നോട്ടിസ് നൽകി. അതിരുവിട്ട ആഘോഷപ്രകടനത്തിൻ്റെ റീൽസ് ചിത്രീകരിക്കാൻ ഉപയോഗിച്ച കാറുകളിലൊന്ന് പൊലീസ് കസ്റ്റഡിയിലെടുത്തിട്ടുണ്ട്. സംഭവത്തിൽ മോട്ടോർ വാഹനവകുപ്പും നടപടികൾ തുടങ്ങിയിട്ടുണ്ട്.