റിയാദ്: ജിസാനിലുണ്ടായ വാഹനാപകടത്തിൽ പതിനഞ്ച് പേർ മരിച്ചു. ഇതിൽ മലയാളിയുൾപ്പെടെ ഒമ്പത് പേർ ഇന്ത്യക്കാരാണ്. ജിസാനിലെ ബൈഷിന് സമീപം ജിസാൻ എക്കണോമിക് സിറ്റി അറാംകോ റിഫൈനറി റോഡിൽ ഇന്നലെ രാവിലെയാണ് അപകടം നടന്നത്. കൊല്ലം കേരളപുരം ശശീന്ദ്ര ഭനത്തിൽ പ്രസാദ് രാധ ദമ്പതികളുടെ മകൻ വിഷ്ണു പ്രസാദ് പിള്ള(31)ആണ് മരിച്ച മലയാളി. മരിച്ചവരിൽ മൂന്ന് പേർ നേപ്പാൾ പൗരന്മാരും മൂന്നു പേർ ഘാന പൗരൻമാരുമാണ്. ഗുരുതരമായി പരുക്കേറ്റ 11 പേർ ജിസാനിലും അബഹയിലുമുള്ള വിവിധ ആശുപത്രികളിൽ തീവ്രപരിചരണ വിഭാഗത്തിൽ ചികിത്സയിലാണ്. ഇതിൽ പലരുടെയും നില ഗുരുതരമാണ്.
അവിവാഹിതനായ വിഷ്ണു മൂന്ന് വർഷമായി ഈ കമ്പനിയിൽ എൻജിനീയറായി ജോലിചെയ്യുകയാണ്. വിഷ്‌ണുവിന്റെ സഹോദരൻ മനു പ്രസാദ് പിള്ള യു.കെ യിൽ സോഫ്റ്റ് വെയർ എൻജിനീയറാണ്.
മഹേഷ് ചന്ദ്ര, മുസഫർ ഹുസ്സൈൻ ഖാൻ ഇമ്രാൻ, പുഷ്‌കർ സിംഗ് ദാമി, സക്ലൈൻ ഹൈദർ, താരിഖ് ആലം മുഹമ്മദ് സഹീർ, മുഹമ്മദ് മോഹത്തഷിം റാസ, ദിനകർ ബായ് ഹരിഭായ് തണ്ടൽ, രമേശ് കപേലി എന്നിവരാണ് മരിച്ച മറ്റ് ഇന്ത്യക്കാരെന്ന് സഊദി പൊലിസ് അറിയിച്ചു.