നെന്മാറ ഇരട്ടക്കൊലപാതക കേസിലെ പ്രതി ചെന്താമരയ്ക്കായി കോഴിക്കോട് കൂടരഞ്ഞിയിൽ തിരച്ചിൽ. ഒരു മാസം മുൻപ് ചെന്താമര ഇവിടെ ജോലി ചെയ്തിരുന്നു.കൂമ്പാറ, തിരുവമ്പാടി, കൂടരഞ്ഞി ഭാഗങ്ങളിലാണ് പരിശോധന നടത്തിയത്. ആലത്തൂർ ഡിവൈഎസ്പ‌ി അറിയിച്ചതിന്റെ അടിസ്ഥാനത്തിലാണ് തിരച്ചിൽ. ചെന്താമര ഇവിടെ വർക്ക് ചെയ്തിരുന്നുവെന്നും കൂടുതൽ അന്വേഷണം നടക്കുകയാണെന്നും ഉദ്യോസ്ഥർ പറഞ്ഞു.
കഴിഞ്ഞ ഒന്നരക്കൊല്ലമായി കോഴിക്കോട് കൂടരഞ്ഞി കൂമ്പാറയിലെ ക്വാറിയിൽ സെക്യൂരിറ്റി ജീവനക്കാരനായി ജോലി ചെയ്യുകയായിരുന്നു ചെന്താമര. കഴിഞ്ഞവർഷം ഡിസംബർ മാസത്തിലാണ് ചെന്താമര വയറിന് സുഖമില്ല എന്നു പറഞ്ഞ് പാലക്കാട്ടേക്ക് തിരിച്ചത്.അതിനുമുൻപ് സഹപ്രവർത്തകനായ സെക്യൂരിറ്റി ജീവനക്കാരൻ മണികണ്ഠനോട് താൻ രണ്ടുപേരെ കൂടി കൊല്ലുമെന്ന് ഇയാൾ പറഞ്ഞിരുന്നു.ഇയാൾക്കാണ് ചെന്താമര ഫോൺ നൽകിയിരുന്നത്.
ആ ഫോൺ കഴിഞ്ഞ ദിവസമാണ് ഇയാൾ ഓൺ ചെയ്ത‌ത്‌. തിരുവമ്പാടി ,മുക്കം പൊലീസ് ഉദ്യോഗസ്ഥർ സംയുക്തമായി കോറിയിലും പരിസരപ്രദേശങ്ങളിലും പരിശോധന നടത്തി. പൊലീസ് മണികണ്ഠനോട് കാര്യങ്ങൾ ചോദിച്ചറിഞ്ഞുനേരത്തെ കൊലപാതകം ചെയ്തിട്ടുണ്ടെന്ന് ചെന്താമര തന്നോട് പറഞ്ഞിരുന്നെന്ന് മണികണ്ഠൻ പറയുന്നു. തൻ്റെ ഉയർച്ചയ്ക്ക് ദോഷം ചെയ്ത ഒരു സ്ത്രീയെ കൊന്നുവെന്നും നാല് കൊല്ലം ജയിലിൽ കിടന്നുവെന്നുമൊക്കെയാണ് പറഞ്ഞത്.
കുടുംബത്തിൽ രണ്ടെണ്ണം കൂടിയുണ്ട്, അവരെ കൂടി കൊല്ലുമെന്നും എന്നിട്ടേ താൻ മരിക്കുകയുള്ളുവെന്നും പറഞ്ഞെന്നും സെക്യൂരിറ്റി വ്യക്തമാക്കി. അസുഖം ബാധിച്ചാണ് പണി നിർത്തി പോയതെന്നും ഇയാൾ പറയുന്നു.
അതേസമയം, കേസിൽ നെന്മാറ എസ്എച്ച്ഒയ്ക്ക് വീഴ്‌ച പറ്റിയെന്ന് എസ്‌പിയുടെ റിപ്പോർട്ട്. പ്രതി നെന്മാറയിൽ താമസിച്ചിട്ടും ഇക്കാര്യം കോടതിയെ അറിയിച്ചില്ലെന്നും ഉത്തരമേഖലാ ഐജിക്ക് നൽകിയ റിപ്പോർട്ടിൽ പറയുന്നു.
വിഷയത്തിൽ സ്റ്റേഷൻ എസ്എച്ച്ഒയ്ക്ക് വീഴ്‌ച പറ്റിയോ എന്ന് വ്യക്തമാക്കണമെന്നാവശ്യപ്പെട്ട് എഡിജിപി ഇന്ന് രാവിലെയാണ് ജില്ലാ പൊലീസ് മേധാവിയോട് റിപ്പോർട്ട് തേടിയത്.
ആ റിപ്പോർട്ടാണ് ഇപ്പോൾ നൽകിയത്. പ്രതി നെന്മാറ വന്ന് ഒരു മാസത്തോളം താമസിച്ചിട്ടും കോടതിയെ അറിയിക്കാൻ പൊലീസിന് കഴിഞ്ഞില്ല എന്നതാണ് പ്രധാന കാര്യം. ഇയാൾ ജാമ്യ വ്യവസ്ഥ ലംഘിച്ചുവെന്ന് ശ്രദ്ധയിൽപെട്ടിട്ടും നടപടിയെടുത്തില്ല, ജാമ്യ ഉത്തരവിലെ ഉപാധികൾ എസ്എച്ച്ഒ ഗൗനിച്ചില്ലെന്നും റിപ്പോർട്ടിലുണ്ട്.
പഞ്ചായത്തിൽ പോലും പ്രവേശിക്കാനുള്ള അനുമതിയില്ലെന്നിരിക്കെ ഒരു മാസത്തോളം ഇയാൾ വീട്ടിൽ വന്ന് താമസിച്ചു എന്നുള്ള കാര്യംസുധാകരന്റെ മകൾ അഖില അറിയിച്ചിട്ടും വേണ്ട ഗൗരവം കൊടുത്തില്ലെന്നും റിപ്പോർട്ടിൽ വ്യക്തമാക്കുന്നുണ്ട്.