തിരുവനന്തപുരം: നെട്ടയത്ത് സ്വകാര്യ സ്‌കൂളിന്റെ ബസിൽ കത്തിക്കുത്ത്. പ്ലസ്‌വൺ വിദ്യാർത്ഥിയാണ് ഒമ്പതാം ക്ലാസ് വിദ്യാർത്ഥിയെ കുത്തിയത്. പരിക്കേറ്റ വിദ്യാർത്ഥിയെ മെഡിക്കൽ കോളേജ്‌ ആശുപത്രിയിൽ പ്രവേശിപ്പിച്ചു. കുത്തിയ വിദ്യാർത്ഥിയെ വട്ടിയൂർക്കാവ് പൊലീസ് പിടികൂടി.
വൈകിട്ട് നാല് മണിയോടെയായിരുന്നു സംഭവം നടന്നത്. സ്‌കൂളിൽ നിന്ന് ബസ് നെട്ടയം മലമുകളിൽ എത്തിയപ്പോഴാണ് ആക്രമണമുണ്ടായത്. വിദ്യാർത്ഥിക്ക് കുത്തേറ്റത് കണ്ട് കൂടെയുണ്ടായിരുന്ന മറ്റുള്ളവർ നിലവിളിച്ചു. ഇതോടെ ബസ് നിർത്തി, നിലവിളി കേട്ട് നാട്ടുകാർ ഓടിക്കൂടിയിരുന്നു.
വിദ്യാർത്ഥികൾ തമ്മിൽ മുൻ വൈരാഗ്യമുണ്ടായിരുന്നുവെന്നാണ് വിവരം. കുത്തിയ വിദ്യാർത്ഥി ഇപ്പോൾ വട്ടിയൂർക്കാവ് പൊലീസ് സ്റ്റേഷനിലാണ് ഉള്ളത്. വിദ്യാർത്ഥിയെ വിശദമായി ചോദ്യം ചെയ്യും.
കുത്തേറ്റ വിദ്യാർത്ഥിയെ ആദ്യം പേരൂർക്കട ആശുപത്രിയിലായിരുന്നു പ്രവേശിപ്പിച്ചിരുന്നത്. പ്രാഥമിക ശുശ്രൂഷകൾക്ക് ശേഷം തിരുവനന്തപുരം മെഡിക്കൽ കോളേജിലേക്ക് മാറ്റുകയായിരുന്നു. വിദ്യാർത്ഥി അപകടനില തരണം ചെയ്തിട്ടുണ്ടെന്നാണ് സൂചന. ലാബിന്റെ ആവശ്യത്തിന് കൊണ്ടുവന്ന ആയുധം ഉപയോഗിച്ചാണ് കുത്തിയതെന്നാണ് പൊലീസ് പറയുന്നത്. ആയുധം പൊലീസ് കസ്റ്റഡിയിലെടുത്തിട്ടുണ്ട്.