ന്യൂഡൽഹി: ഇന്ത്യൻ ക്രിക്കറ്റിന്റെ ഇതിഹാസ താരം വിരാട് കോഹ്‍ലി ടെസ്റ്റ് ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചു. 123 ടെസ്റ്റ് മത്സരങ്ങളിൽ ഇന്ത്യയെ പ്രതിനിധീകരിച്ച കോഹ്‍ലി, 46 ശരാശരിയോടെ 9230 റൺസും 30 സെഞ്ചുറികളും നേടിയിട്ടുണ്ട്.

“14 വർഷം ഇന്ത്യയുടെ നീല ടെസ്റ്റ് തൊപ്പി അണിഞ്ഞു. ഈ ഫോർമാറ്റ് എന്നെ വളർത്തി, പരീക്ഷിച്ചു, ജീവിതപാഠങ്ങൾ പഠിപ്പിച്ചു. ഇതിൽ നിന്ന് വിടപറയുക എളുപ്പമല്ല, പക്ഷേ ഇപ്പോൾ ഇത് ശരിയാണെന്ന് വിശ്വസിക്കുന്നു. ഞാൻ എന്റെ എല്ലാം ഈ കളിക്കായി നൽകി. കളിയോടും, ആരാധകരോടും, ഒപ്പം കളിച്ചവർക്കും, എന്റെ യാത്രയിൽ കണ്ടുമുട്ടിയ എല്ലാവർക്കും ഹൃദയത്തിന്റെ നന്ദി,” കോഹ്‍ലി ഇൻസ്റ്റഗ്രാമിൽ കുറിച്ചു.

2011ൽ വെസ്റ്റ് ഇൻഡീസിനെതിരെ ടെസ്റ്റ് അരങ്ങേറ്റം കുറിച്ച കോഹ്‍ലിയുടെ ഏറ്റവും ഉയർന്ന സ്കോർ 2019ൽ ദക്ഷിണാഫ്രിക്കയ്ക്കെതിരെ നേടിയ 254 റൺസാണ്. 68 ടെസ്റ്റുകളിൽ ഇന്ത്യയെ നയിച്ച അദ്ദേഹം 40 വിജയങ്ങൾ നേടി, ഇന്ത്യയ്ക്ക് ഏറ്റവും കൂടുതൽ ടെസ്റ്റ് വിജയങ്ങൾ സമ്മാനിച്ച ക്യാപ്റ്റനായി. 2024ലെ ടി20 ലോകകപ്പ് വിജയത്തിന് ശേഷം ടി20യിൽ നിന്ന് വിരമിച്ച കോഹ്‍ലി, ഇനി ഏകദിന ക്രിക്കറ്റിൽ മാത്രം ശ്രദ്ധ കേന്ദ്രീകരിക്കും.