കട്ടിപ്പാറ: പുസ്തകങ്ങളെ നെഞ്ചോട് ചേർത്ത് നസ്രത്ത് എൽ പി സ്കൂൾ മുത്തോറ്റിക്കലിൽ വായനാവാരാചരണത്തിന് തുടക്കമായി. വായനാദിനത്തിൻ്റെ പ്രാധാന്യം കുട്ടികളിൽ എത്തിക്കുക എന്ന ലക്ഷ്യത്തോടെ വായനാദിനത്തിൽ പ്രത്യേകമായി അസംബ്ലി ചേർന്നു. അസംബ്ലിയോട് ചേർന്ന് നടത്തപ്പെട്ട യോഗത്തിന് മശ്ഹൂദ് സാർ സ്വാഗതം ആശംസിച്ചു. യോഗത്തിൽ പ്രധാനാധ്യാപിക ശ്രീ ചിപ്പി രാജ് അധ്യക്ഷപദം അലങ്കരിക്കുകയും വായന എന്നത് നമ്മുടെ വ്യക്തിത്വത്തെയും അറിവിനെയും രൂപപ്പെടുത്തുന്നതിൽ വലിയ പങ്കു വഹിക്കുന്ന ഒരു ശീലമാണെന്നും അത് നമ്മെ അറിവിൻ്റെ ലോകത്തേക്ക് എത്തിക്കുമെന്നും കുട്ടികൾക്ക് പറഞ്ഞുകൊടുക്കുകയുണ്ടായി. സ്കൂളിൽ ഒരാഴ്ച നീണ്ടു നിൽക്കുന്ന വായനാവാരാചരണം പി ടി എ പ്രസിഡൻ്റ് ശ്രീ ഷാഹിം ഹാജി അക്ഷരദീപം കൊളുത്തി ഉദ്ഘാടനം ചെയ്തു. ശേഷം സ്കൂൾ ശ്രന്ഥശാല പ്രദർശന ഉദ്ഘാടനം കട്ടിപ്പാറ നെഹ്റു മെമ്മോറിയൽ ഗ്രന്ഥശാല ലൈബ്രേറിയൻ ശ്രീ സുനിൽ നെടുങ്ങാട്ട് നിർവ്വഹിച്ചു. ചടങ്ങിൽ അധ്യാപിക ആഷ്ന റോസ് വായനാദിന സന്ദേശം നൽകുകയും സോണിയ ഫിലിപ്പ് കുട്ടികൾക്കായ് പുസ്തക പരിചയം നടത്തുകയും ചെയ്തു. സ്റ്റാഫ് സെക്രട്ടറി ഷിൽ ജ എം ആറിൻ്റെ നന്ദിയോടെ യോഗം അവസാനിച്ചു. യോഗത്തിന് ശേഷം വിപുലമായി ഒരുക്കിയ പുസ്തക പ്രദർശനത്തിൽ കുട്ടികൾ ധാരാളം പുസ്തകങ്ങളെ പരിചയപ്പെട്ടു. വായനാദിന ആഘോഷത്തിൻ്റെ ഭാഗമായി പ്രത്യേക റേഡിയോ സംപ്രേക്ഷണവും ക്വിസ് മത്സരവും കുട്ടികൾക്കായി മധുര വിതരണവും നടന്നു. ഒരാഴ്ച നീളുന്ന വിപുലമായ വായനാവാര പരിപാടികൾക്ക് ഇന്ന് നസ്രത്ത് എൽ പി സ്കൂളിൽ തുടക്കമായി.