മലപ്പുറം: ഇസ് ലാമിക പ്രബോധനത്തിന്റെ പൈതൃകവഴികളില്‍ 99 ആണ്ട് പൂര്‍ത്തിയാക്കി സമസ്ത ഇനി ശതാബ്ദിയിലേക്ക്. കേരളാ മുസ് ലിംകളുടെ മതപരമായ പുരോഗതിക്ക് ശക്തിപകര്‍ന്ന പണ്ഡിത പ്രസ്ഥാനമായ സമസ്ത കേരളാ ജംഇയ്യതുല്‍ ഉലമാ 1926 ജൂണ്‍ 26നാണ് രൂപീകരിച്ചത്. ഇസ് ലാമിക വിശ്വാസ,ആചാര,അനുഷ്ഠാന മാര്‍ഗത്തെ പാരമ്പര്യരീതിയില്‍ സമൂഹത്തിന് പ്രബോധനം ചെയ്യുന്ന സുന്നത്ത് ജമാഅത്തിന്റെ ആദര്‍ശവഴിയില്‍ ചരിത്രദൗത്യമാണ് സമസ്ത നിര്‍വഹിക്കുന്നത്. ഇസ് ലാമിക സംസ്‌കാരത്തിന്റെ തനതുരീതിയില്‍ കേരളീയ മുസ് ലിംകളുടെ ഓരോ പുരോഗതിയേയും അടിസ്ഥാനപ്പെടുത്തിയാണ് സമസ്തയുടെ സംഘടനാ രീതി.
മദ്‌റസാ പ്രസ്ഥാനം, മഹല്ല് സംവിധാനം, മത-ഭൗതിക ഉന്നത വിദ്യാഭ്യാസം, സാമുദായിക പുരോഗതിക്കാവശ്യമായ പ്രവര്‍ത്തനങ്ങള്‍, മുസ് ലിം അവകാശ സംരക്ഷണം, മാനവ സൗഹാർദം, രാഷ്ട്രപുരോഗതി തുടങ്ങി വിവിധ മേഖലകളിലൂന്നിയാണ് സമസ്തയും അതിന്റെ പോഷകഘടകങ്ങളുടെയും പ്രവര്‍ത്തനം.
മത വിദ്യാഭ്യാസ രംഗത്ത് സമസ്തക്ക് കീഴില്‍ രൂപം നല്‍കിയ സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് മദ്‌റസാ പ്രസ്ഥാനത്തിലൂടെ ലോകതലത്തില്‍ ചരിത്രദൗത്യമാണ് നിറവേറ്റിയത്.
ഇന്ത്യയിലെ 14 സംസ്ഥാനങ്ങളിലും ആറ് വിദേശ രാഷ്ട്രങ്ങളിലുമായി 10,998 മദ്‌റസകള്‍ ബോര്‍ഡിന് കീഴിലുണ്ട്. ഉന്നത മതപഠനത്തിന് സമസ്തക്ക് കീഴില്‍ ജാമിഅ നൂരിയ്യ അറബിയ്യ, വിദ്യാഭ്യാസ ബോര്‍ഡിന് കീഴില്‍ ഓണ്‍ലൈന്‍ മദ്‌റസാ വിദ്യാഭ്യാസ രംഗത്ത് ഇ-ലേണിങ്, ഉന്നത വിദ്യാഭ്യാസ രംഗത്ത് സമസ്ത നാഷനല്‍ എജ്യുക്കേഷന്‍ കൗണ്‍സില്‍ (എസ്.എന്‍.ഇ.സി), കോഡിനേഷന്‍ ഓഫ് സമസ്ത വിമണ്‍സ് കോളജസ് (ഫാളില,ഫളീല),അല്‍ബിര്‍ സ്‌കൂള്‍സ്, അസോസിഷേയന്‍ ഓഫ് സമസ്ത മൈനോരിറ്റി എജ്യുക്കേഷന്‍(അസ്മി) തുടങ്ങിയ സംവിധാനങ്ങളുമുണ്ട്. എസ്.വൈ.എസ്, സുന്നി മഹല്ല് ഫെഡറേഷന്‍, സമസ്ത കേരളാ ജംഇയ്യതുല്‍ മുഅല്ലിമീന്‍,മദ്‌റസാ മാനേജ്‌മെന്റ് അസോസിയേഷന്‍, ജംഇയ്യതുല്‍ മുദരിസീന്‍, ജംഇയ്യതുല്‍ ഖുത്വബാഅ്, എസ്.കെ.എസ്.എസ്.എഫ്, ജംഇയ്യതുല്‍ മുഫത്തിശീന്‍, എസ്.ഐ.സി, എസ്.ഇ.എ, സമസ്ത പ്രവാസി സെല്‍, സമസ്ത ലീഗല്‍ സെല്‍, എസ്.കെ.എസ്.ബി.വി തുടങ്ങിയ ഘടകങ്ങളും വിവിധ പ്രവര്‍ത്തനങ്ങള്‍ നടത്തുന്നു. ശതാബ്ദി ആഘോഷ സമ്മേളനം 2026 ഫെബ്രുവരി 4 മുതല്‍ 8 വരെ കാസര്‍കോട് കുണിയയില്‍ വച്ചാണ് നടക്കുന്നത്. സ്ഥാപകദിനമായ ഇന്ന് സംസ്ഥാനത്തിനകത്തും പുറത്തും വിപുലമായ പരിപാടികൾ സംഘടിപ്പിക്കുന്നുണ്ട്.
പരിപാടികളുടെ തുടക്കം കുറിച്ച് കോഴിക്കോട് വരക്കല്‍ മഖാം അങ്കണത്തിൽ ഇന്ന് രാവിലെ 11ന് പതാക ഉയര്‍ത്തും. സ്ഥാപക പ്രസിഡന്റ് വരക്കല്‍ മുല്ലക്കോയ തങ്ങളും ദീര്‍ഘകാലം സമസ്തയെ നയിച്ച ശംസുല്‍ ഉലമ ഇ.കെ അബൂബക്കര്‍ മുസ്‌ലിയാരും അന്ത്യവിശ്രമം കൊള്ളുന്ന മഖാമില്‍ സിയാറത്ത് നടക്കും. തുടര്‍ന്ന് മഖാം അങ്കണത്തില്‍ പ്രത്യേകം സജ്ജീകരിച്ച പന്തലില്‍ സ്ഥാപകദിന സംഗമം പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങള്‍ ഉദ്ഘാടനം ചെയ്യും. എം.ടി അബ്ദുല്ല മുസ്‌ലിയാര്‍, കൊയ്യോട് പി.പി ഉമര്‍ മുസ്‌ലിയാര്‍, കോട്ടുമല എം.കെ മൊയ്തീന്‍ കുട്ടി മുസ്‌ലിയാര്‍, യു.എം അബ്ദുറഹ്മാന്‍ മുസ്‌ലിയാര്‍, എം.പി കുഞ്ഞി മുഹമ്മദ് മുസ്‌ലിയാര്‍, കെ. ഉമര്‍ ഫൈസി മുക്കം, കേന്ദ്ര മുശാവറ അംഗങ്ങള്‍, പാണക്കാട് അബ്ബാസലി ശിഹാബ് തങ്ങള്‍, സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ഹമീദലി ശിഹാബ് തങ്ങള്‍, സമസ്ത യുടെയും പോഷക സംഘടനകളുടെയും നേതാക്കള്‍, ഗള്‍ഫ് സംഘടന നേതാക്കള്‍, പൗരപ്രമുഖര്‍ സംബന്ധിക്കും.
സമസ്ത നൂറാം വാര്‍ഷിക മഹാസമ്മേളനത്തിന്റെ ഉപഹാരമായി പ്രസിദ്ധീകരിക്കുന്ന നൂറ് പുസ്തകങ്ങളില്‍ 10 പുസ്തകങ്ങളുടെ പ്രകാശനവും നൂറാം വാര്‍ഷിക പ്രചാരണ പോസ്റ്റര്‍ പ്രകാശനവും ചടങ്ങില്‍ നടക്കും.