കാസർകോട്: അമ്മയെ തീകൊളുത്തി കൊലപ്പെടുത്തിയ സംഭവത്തിൽ മകൻ അറസ്റ്റിൽ. മഞ്ചേശ്വരം വോർക്കാടി നലങ്ങി സ്വദേശി ഫിൽഡ (60)യെ കൊലപ്പെടുത്തിയ കേസിൽ മകൻ മെൽവിൻ മൊണ്ടേറ ആണ് പിടിയിലായത്. അമ്മയെ തീകൊളുത്തിയശേഷം ഇയാൾ അയൽവാസിയായ സ്ത്രീയേയും വീട്ടിലേയ്ക്ക് വിളിച്ചുവരുത്തി തീകൊളുത്താൻ ശ്രമിച്ചിരുന്നു.

സംഭവത്തിനുശേഷം ഒളിവിൽപോയ പ്രതിയെ ഉഡുപ്പി കുന്ദാപുരയിൽ വെച്ചാണ് പിടികൂടിയത്. 200 കിലോമീറ്റർ പിന്തുടർന്നാണ് പ്രതിയെ പിടികൂടിയതെന്ന് പോലീസ് വ്യക്തമാക്കി.

ബുധനാഴ്ച രാത്രിയോടെയാണ് നാടിനെ നടുക്കിയ സംഭവം ഉണ്ടായത്. അമ്മ ഫിൽഡയെ തീകൊളുത്തി കൊലപ്പെടുത്തിയ ശേഷം മെൽവിൻ അയൽവാസിയായ ലോലിറ്റയെ വീട്ടിലേക്ക് വിളിച്ചുവരുത്തി. വീട്ടിലെത്തിയ ലോലിറ്റയേയും മെൽവിൻ തീകൊളുത്തി അപായപ്പെടുത്താൻ ശ്രമിച്ചു. പിന്നാലെയാണ് ഇയാൾ ഒളിവിൽ പോയത്.

വ്യാഴാഴ്ച രാവിലെ വീട്ടിലെത്തിയ അയൽക്കാരാണ് ഫിൽഡയേയും ലോലിറ്റയേയും പൊള്ളലേറ്റ നിലയിൽ കണ്ടെത്തിയത്. ഫിൽഡ മരിച്ചിരുന്നു. ഗുരുതരമായി പരിക്കേറ്റിരുന്ന ലോലിറ്റയെ ഇവർ ഉടൻതന്നെ ആശുപത്രിയിൽ പ്രവേശിപ്പിച്ചു. സംഭവത്തിൽ അന്വേഷണം പുരോഗമിക്കുകയാണ്.