തൃശ്ശൂർ: ഓടുന്ന ബസ്സിൽ നിന്ന് തെറിച്ചുവീണ്  യാത്രക്കാരിക്ക് ദാരുണാന്ത്യം. പൂവത്തൂര്‍ സ്വദേശിനി നളിനിയാണ് (74 വയസ്) മരിച്ചത്. രാവിലെ പത്തേകാലോടെ പൂവത്തൂർ പൂച്ചക്കുന്ന് ഭാഗത്തുനിന്നും സ്വകാര്യ ബസ്സിൽ കയറിയ നളിനി, ഡ്രൈവർ സീറ്റിന് പുറകിൽ നിന്ന് ഒഴിഞ്ഞ സീറ്റിലേക്ക് മാറുന്നതിനിടെ ബാലൻസ് തെറ്റി മുൻവശത്തെ ഡോറിലൂടെ പുറത്തേക്ക് വീഴുകയായിരുന്നു. ഡോർ അടച്ചിരുന്നെങ്കിലും യാത്രക്കാരി വീണപ്പോള്‍ തുറന്ന് പോവുകയായിരുന്നു. 

അപകടം നടന്നയുടൻ പറപ്പൂർ പ്രാഥമിക ആരോഗ്യ കേന്ദ്രത്തിൽ എത്തിച്ചെങ്കിലും ജീവന്‍ രക്ഷിക്കാനായില്ല. സ്വകാര്യ ഫൈനാൻസ് സ്ഥാപനത്തിലെ കളക്ഷൻ ഏജന്റായിരുന്നു നളിനി. ജോലിക്ക് പോകും വഴിയാണ് അപകടം ഉണ്ടായത്. ബസ്സുകളുടെ വാതിൽ സുരക്ഷയെക്കുറിച്ചുള്ള ചോദ്യങ്ങൾ ഈ അപകടത്തോടെ വീണ്ടും ഉയർന്നിട്ടുണ്ട്