കൊടുവള്ളി: കൊടുവള്ളി നിയോജകമണ്ഡലത്തിലൂടെ കടന്നുപോകുന്ന കൊയിലാണ്ടി-എടവണ്ണ സംസ്ഥാനപാതയുടെ ശോച്യാവസ്ഥയിൽ അടിയന്തരമായി ഇടപെടണമെന്ന് ആവശ്യപ്പെട്ട് എം.എൽ.എ. ഡോ. എം.കെ. മുനീർ കെ.എസ്.ടി.പി. എക്സിക്യൂട്ടീവ് എൻജിനിയർക്ക് കത്ത് നൽകി. അടുത്തിടെ റോഡിൽ രൂപപ്പെട്ട കുഴിയിൽ തെന്നി ബൈക്ക് യാത്രികൻ മരിച്ച സാഹചര്യത്തിൽ, റോഡിന്റെ ദുരവസ്ഥ അതീവ ഗൗരവതരമാണെന്ന് കത്തിൽ ചൂണ്ടിക്കാട്ടി.

പ്രധാനമായും, റോഡിലെ കൂടത്തായി പാലത്തിന്റെ ബലക്ഷയമാണ് എം.എൽ.എ. ഉന്നയിച്ച പ്രധാന പ്രശ്നം. ഭാരമേറിയ വാഹനങ്ങൾ കടന്നുപോകുമ്പോൾ പാലത്തിന് ശക്തമായ കുലുക്കം അനുഭവപ്പെടുന്നുണ്ട്. ഈ വിഷയത്തിൽ നേരത്തെയും അധികൃതർക്ക് കത്ത് നൽകിയിരുന്നതായും, പൊതുമരാമത്ത് വകുപ്പിന്റെ യോഗത്തിൽ പ്രശ്നം ഉന്നയിച്ച് അടിയന്തര നടപടികൾക്ക് നിർദേശം നൽകിയിട്ടുണ്ടെന്നും എം.എൽ.എ. അറിയിച്ചു.
കൂടാതെ, പാലത്തിന്റെ സുരക്ഷ ഉറപ്പാക്കുന്നതിനായി ഭാരമേറിയ വാഹനങ്ങൾക്ക് താൽക്കാലികമായി നിരോധനം ഏർപ്പെടുത്തണമെന്നും, പാലത്തിന്റെ ഘടനാപരമായ ബലക്ഷയം പരിഹരിക്കുന്നതിനുള്ള ശാസ്ത്രീയമായ അറ്റകുറ്റപ്പണികൾ സമയബന്ധിതമായി പൂർത്തിയാക്കണമെന്നും അദ്ദേഹം ആവശ്യപ്പെട്ടു.
കോടികൾ ചെലവഴിച്ച് നവീകരിച്ച റോഡിന്റെ നിർമ്മാണത്തിലെ അപാകതകളെക്കുറിച്ച് വ്യാപകമായ പരാതികൾ മുൻപും ഉയർന്നിരുന്നു. പല ഭാഗങ്ങളിലും റോഡ് താഴ്ന്നുപോകുന്നതും കുഴികൾ രൂപപ്പെടുന്നതും അപകടങ്ങൾ വർധിക്കുന്നതും പതിവാണെന്ന് യാത്രക്കാർ ചൂണ്ടിക്കാട്ടുന്നു. ഈ വിഷയത്തിൽ അടിയന്തരമായി ഇടപെട്ട് യാത്രക്കാരുടെ സുരക്ഷ ഉറപ്പാക്കാൻ ബന്ധപ്പെട്ട വകുപ്പുകൾക്ക് നിർദേശം നൽകിയിട്ടുണ്ടെന്നും കത്തിൽ എം.എൽ.എ. വ്യക്തമാക്കി.