ദുബൈ: ദുബൈയില്‍ റോഡ് മുറിച്ചു കടക്കുന്നതിനിടെ വാഹനമിടിച്ച് ഗുരുതരമായി പരുക്കേറ്റ കണ്ണൂര്‍ സ്വദേശിനി റഹ്മത്ത് ബീവിക്ക് 10 ലക്ഷം ദിര്‍ഹം (2.3 കോടി) നഷ്ടപരിഹാരം നല്‍കാന്‍ കോടതി ഉത്തരവ്. ക്രിമിനല്‍ കോടതിയാണ് യുവതിക്ക് 2.3 കോടി രൂപ നഷ്ടപരിഹാരം നല്‍കാന്‍ ഉത്തരവിട്ടത്. 2023 ഏപ്രില്‍ 24നായിരുന്നു കേസിനാസ്പദമായ സംഭവം. 

വാഹനമിടിച്ച ഇവരെ ഗുരുതര പരുക്കുകളോടെയാണ് ദുബൈ റാഷിദ് ആശുപത്രിയില്‍ പ്രവേശിപ്പിച്ചത്. യാബ് ലീഗല്‍ സര്‍വീസസ് മുഖേന യുവതിയുടെ കുടുംബം നഷ്ടപരിഹാരം ആവശ്യപ്പെട്ട് പ്രാഥമിക കോടതിയില്‍ കേസ് ഫയല്‍ ചെയ്തിരുന്നു. ഇതിലാണ് 10 ലക്ഷം ദിര്‍ഹം നഷ്ടപരിഹാരം നല്‍കാന്‍ ഉത്തരവായിരിക്കുന്നത്.

അപകടം നടന്ന സമയത്തെ ഇന്‍ഷുറന്‍സ് കമ്പനിയാണ് യുവതിക്ക് നഷ്ടപരിഹാരം നല്‍കേണ്ടത്. വിധിക്കെതിരെ ഇന്‍ഷുറന്‍സ് കമ്പനി അപ്പീല്‍ കോടതിയേയും പിന്നീട് സുപ്രീം കോടതിയേയും സമീപിച്ചിരുന്നു. എന്നാല്‍ പ്രാഥമിക കോടതി പുറപ്പെടുവിച്ച വിധി ശരിവയ്ക്കുകയായിരുന്നു.

അതേസമയം ഡ്രൈവറുടെ അശ്രദ്ധയും റോഡ് ഉപയോക്താക്കളെ ശ്രദ്ധിക്കാതെയുള്ള ഡ്രൈവിംഗും അപകട കാരണമായെന്ന് ചൂണ്ടിക്കാട്ടിയ കോടതി അനുവാദമില്ലാത്ത സ്ഥലത്ത് വെച്ച് റോഡ് മുറിച്ചു കടക്കാന്‍ ശ്രമിച്ച റഹ്മത്തും അപകടത്തിന് ഉത്തരവാദിയെന്ന് പറഞ്ഞിരുന്നു. വാഹനമോടിച്ച് അപകടം ഉണ്ടാക്കിയ സ്വദേശി പൗരന്‍ 3000 ദിര്‍ഹവും റഹ്മത്ത് 1000 ദിര്‍ഹവും പിഴ അടക്കാനും കോടതി ഉത്തരവിട്ടിരുന്നു.