ജിസാൻ: ഇന്ന് നാട്ടിൽ പോകാനിരിക്കെ മലയാളി സൗദി റോഡപകടത്തിൽ മരിച്ചു. സൗദി, ജിസാനിൽ ജോലി നോക്കുന്ന മഞ്ചേരി, പാണായി മുള്ളമ്പാറ സ്വദേശി അബ്ബ മൻസിലിൽ റിയാസ്ബാബു കോർമത്താണ് (47) വാഹനമിടിച്ച് മരിച്ചത്. മുഹമ്മദ് കോർമത്തിന്റെയും സുഹ്റയുടെയും മകനാണ്. സാഹിനയാണ് ഭാര്യ. മക്കളായ ഹാനിയ, ഹനാൻ, ഹന എന്നിവർ നാട്ടിൽ വിദ്യാർത്ഥികളാണ്.

ജിസാൻ നഗരത്തിൽ നിന്ന് 35 കിലോമീറ്റർ അകലെ അബൂഅരീഷിന് സമീപമുള്ള അൽവാസലിയിൽ താമസസ്ഥലത്തിനടുത്ത് വെച്ച് ഇന്നലെ രാത്രി പതിനൊന്നരയോടെയായിരുന്നു അപകടം. റോഡിലൂടെ താമസ്ഥലത്തേക്ക് നടന്നു പോകുകയായിരുന്ന റിയാസിനെ പിന്നിൽ നിന്നു വന്ന കാർ ഇടിക്കുകയായിരുന്നുവെന്ന് സുഹൃത്തുക്കൾ അറിയിച്ചു.
അപകടത്തിൽ തലയ്ക്കും ശരീരത്തിനും ഗുരുതരമായി പരിക്കേറ്റ റിയാസിലെ സംഭവസ്ഥലത്തെത്തിയ പോലീസ് ഉടൻ തന്നെ അബൂഅരീഷ് കിംഗ്‌ഫഹദ് സ്പെഷ്യലിറ്റി ആശുപത്രിയിലെ തീവ്രപരിചരണ വിഭാഗത്തിൽ എത്തിച്ചെങ്കിലും ഇന്ന് പുലർച്ചെ മൂന്നു മണിയോടെ അന്ത്യം സംഭവിച്ചു.

കഴിഞ്ഞ 18 വർഷമായി ജിസാനിലുള്ള റിയാസ് അൽവാസലിയിൽ സൂപ്പർമാർക്കറ്റ് ജീവനക്കാരനായിരുന്നു. എട്ടു മാസം മുമ്പാണ് അവസാനമായി നാട്ടിൽ പോയിവന്നത്. ജിസാൻ എയർപോർട്ടിൽ നിന്ന് എയർഅറേബ്യ വിമാനത്തിൽ വെള്ളിയാഴ്ച്ച വൈകുന്നേരം അഞ്ചു മണിക്ക് ഷാർജ വഴി കോഴിക്കോട്ടേക്ക്
പോകാനിരുന്നതാണ്. കടയിൽ നിന്ന് രണ്ടുദിവസം മുമ്പ് ജോലി അവസാനിപ്പിച്ച് നാട്ടിൽ പോകുന്നതിനുള്ള തയ്യാറെടുപ്പുകൾ നടത്തിയിരുന്നു. അപകട വിവരമറിഞ്ഞ് ജിസാൻ ആർട്ട് ലവേഴ്സ‌് അസോസിയേഷൻ (ജല) കേന്ദ്ര കമ്മിറ്റി ഭാരവാഹികളായ സലാം കൂട്ടായി, സണ്ണി ഓതറ, സലിം മൈസൂർ യൂണിറ്റ് ഭാരവാഹികളായ വിപിൻ, അഷറഫ് പാണ്ടിക്കാട്, ബാബു മഞ്ചേരി എന്നിവർ സഹായങ്ങളുമായി ആശുപത്രിയിൽ എത്തിയിരുന്നു.

അബൂഅരീഷ് കിംഗ്‌ഫഹദ് ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം നിയമനടപടികൾക്ക് ശേഷം ജിസാനിൽ ഖബറടക്കും