കണ്ണൂര്‍: കണ്ണൂരില്‍ ട്രാഫിക് ഡ്യൂട്ടിക്കിടെ നില്‍ക്കുകയായിരുന്ന പൊലിസുകാരന് നേരെ കാര്‍ ഇടിച്ചു കയറ്റി എസ്‌ഐയ്ക്ക് പരിക്കേറ്റു. വളപട്ടണം എസ്‌ഐ ടിഎം വിപിനാണ് പരിക്കേറ്റത്. സംഭവത്തില്‍ കണ്ണൂര്‍ മാടായി സ്വദേശി ഫായിസ്, മാട്ടൂല്‍ സ്വദേശി നിയാസ് എന്നിവര്‍ പൊലിസ് പിടിയിലായി.
എസ്‌ഐയെ ഇടിച്ച് ബോണറ്റില്‍ കയറ്റിയ കാര്‍ ഒരു ഓട്ടോയിലും മതിലിലും ഇടിച്ചാണ് നിന്നത്. ഇന്നലെ രാത്രിയാണ് സംഭവം. വളപട്ടണം പാലത്തിന് സമീപം അപകടകരമായ രീതിയില്‍ കാര്‍ ഓടിച്ചു വന്നിരുന്ന യുവാക്കളെ പൊലിസ് തടയുകയായിരുന്നു. എന്നാല്‍ കാര്‍ നിര്‍ത്താതെ പോയി എസ്‌ഐയെ ഇടിക്കുകയായിരുന്നു.
പരിക്കേറ്റ പൊലിസ് ഉദ്യോഗസ്ഥന്‍ തലനാരിഴയ്ക്കാണ് രക്ഷപ്പെട്ടത്. അറസ്റ്റിലായ യുവാക്കള്‍ക്ക് ലൈസന്‍സ് ഉണ്ടായിരുന്നില്ലെന്നതും പരിശോധനയില്‍ കണ്ടെത്തി. ഇരുവരേയും കോടതിയില്‍ ഹാജരാക്കി റിമാന്‍ഡ് ചെയ്തു.