2025ലെ സമാധാന നോബൽ വെനസ്വേലൻ നേതാവ് മരിയ കൊറിന മചാഡോയ്ക്ക് ലഭിച്ചു. വെനസ്വേലയിൽ ജനാധിപത്യ അവകാശങ്ങൾക്കു വേണ്ടി നടത്തുന്ന പോരാട്ടങ്ങൾക്കാണ് മരിയയ്ക്ക് സമാധാന നോബൽ നൽകുന്നതെന്ന് കമ്മിറ്റി പ്രസ്താവിച്ചു.

വെനിസ്വേലയിലെ ജനങ്ങളുടെ ജനാധിപത്യ അവകാശങ്ങൾക്കു വേണ്ടി അവർ അക്ഷീണം പ്രവർത്തിച്ചതിനാണ് പുരസ്കാരം. സ്വേച്ഛാധിപത്യത്തിൽ നിന്ന് ജനാധിപത്യത്തിലേക്കുള്ള നീതിയുക്തവും സമാധാനപരവുമായ മാറ്റം കൈവരിക്കാനുള്ള അവരുടെ പോരാട്ടത്തിനാണ് സമാധാനത്തിനുള്ള നോബൽ സമ്മാനം ലഭിക്കുന്നത്," കമ്മിറ്റി പ്രഖ്യാപനത്തിൽ പറഞ്ഞു.

2025ലെ സമാധാനത്തിനുള്ള നോബൽ സമ്മാനത്തിനായി 338 പേരുകൾ നാമനിർദ്ദേശം ചെയ്യപ്പെട്ടിരുന്നു. ഇതിൽ 244 വ്യക്തികളും 94 സംഘടനകളുമാണ്. നോർവേയിലെ ഓസ്ലോയിൽ വെച്ച് നോർവീജിയൻ നോബൽ കമ്മിറ്റിയാണ് സമ്മാനാർഹരെ പ്രഖ്യാപിച്ചത്. ഡിസംബർ 10ന് സമ്മാനം വിതരണം ചെയ്യും. ആൽഫ്രഡ് നോബലിന്റെ താൽപ്പര്യപ്രകാരമാണ് ഈ അന്താരാഷ്ട്ര പുരസ്കാരം ഏർപ്പെടുത്തിയിരിക്കുന്നത്.

നോമിനേഷനുകൾ രഹസ്യമായി സൂക്ഷിക്കുമെങ്കിലും, ചില നോർവീജിയൻ പാർലമെന്റംഗങ്ങളും മറ്റ് അക്കാദമിക് വിദഗ്ധരും തങ്ങളുടെ ഇഷ്ട സ്ഥാനാർത്ഥികളെ പരസ്യമായി പ്രഖ്യാപിക്കാറുണ്ട്. ഇത് സ്ഥാനാർത്ഥിക്കു വേണ്ടിയുള്ള പ്രചാരണത്തിന് സഹായകമാകാറുമുണ്ട്.

നോബൽ ഫൗണ്ടേഷന്റെ ചട്ടങ്ങൾ അനുസരിച്ച് ചില പ്രത്യേക വിഭാഗങ്ങളിൽപ്പെട്ടവർക്ക് മാത്രമേ നാമനിർദ്ദേശം സമർപ്പിക്കാൻ അനുവാദമുള്ളൂ. ഇതിൽ രാജ്യസഭാംഗങ്ങൾ, മന്ത്രിമാർ, രാഷ്ട്രത്തലവന്മാർ, അന്താരാഷ്ട്ര നീതിന്യായ കോടതിയിലെ അംഗങ്ങൾ, ചില സർവ്വകലാശാലകളിലെ പ്രൊഫസർമാർ, സമാധാന ഗവേഷണ സ്ഥാപനങ്ങളുടെ ഡയറക്ടർമാർ, മുൻ നോബൽ സമ്മാന ജേതാക്കൾ എന്നിവരെല്ലാം ഉൾപ്പെടുന്നു.

നോർവീജിയൻ നോബൽ കമ്മിറ്റിയിലെ ഇപ്പോഴത്തെയും മുൻ അംഗങ്ങൾക്കും മുൻ ഉപദേഷ്ടാക്കൾക്കും നാമനിർദ്ദേശം സമർപ്പിക്കാം. ഫെബ്രുവരി 1ന് ശേഷം നടക്കുന്ന ആദ്യ യോഗത്തിൽ കമ്മിറ്റിയിലെ ഇപ്പോഴത്തെ അംഗങ്ങൾക്ക് അവരുടെ നിർദ്ദേശങ്ങൾ സമർപ്പിക്കാം.