പയ്യോളി: മണിയൂർ പഞ്ചായത്ത് തല കേരളോത്സവത്തിനിടയിൽ പ്രായപൂർത്തിയാവാത്ത പെൺകുട്ടിയെ പീഡിപ്പിച്ച കേസിൽ റിട്ടയേർഡ് അധ്യാപകൻ അറസ്റ്റിൽ. മണിയൂർ എളമ്പിലാട് മീത്തലെ പൊയിൽ 70 വയസുള്ള എം പി വിജയനാണ് അറസ്റ്റിലായത്. വടകര ഡിവൈഎസ്പി എ. ഉമേഷാണ് അറസ്റ്റ് ചെയ്തത്. ഒക്ടോബർ 20ന് പഞ്ചായത്ത് തല കേരള ഉത്സവത്തിനിടയിലാണ് കേസിന് ആസ്പദമായ സംഭവം നടന്നത്.

സംഭവത്തെ തുടർന്ന് പ്രതി ഒളിവിൽ പോവുകയായിരുന്നു. എന്നാൽ പ്രതിയെ പിടികൂടാത്തതിനെ ചൊല്ലി ഏറെ രാഷ്ട്രീയ വിവാദങ്ങൾ ഉടലെടുത്തിരുന്നു. മണിയൂർ പഞ്ചായത്ത് ഓഫീസിലേക്കും പയ്യോളി പോലീസ് സ്റ്റേഷനിലേക്കും യുഡിഎഫ് പ്രതിഷേധ മാർച്ച് സംഘടിപ്പിച്ചിരുന്നു.

കോടതി നേരത്തെ ഇയാളുടെ ജാമ്യാപേക്ഷ തള്ളിയിരുന്നു. തുടർന്ന് ഇന്ന് രാവിലെ പിടികൂടിയ പ്രതിയെ വൈദ്യ പരിശോധനയ്ക്ക് ശേഷം കോടതിയിൽ ഹാജരാക്കുമെന്നാണ് പോലീസ് അറിയിച്ചിരിക്കുന്നത്.