കട്ടിപ്പാറ:കട്ടിപ്പാറ പഞ്ചായത്തിലെ ചമല് പൂവന്മലയില് മുളകുപൊടിയുമായെത്തി അയല്വീട്ടില് അതിക്രമിച്ചുകയറി, ഒറ്റയ്ക്കുതാമസിക്കുന്ന വീട്ടമ്മയുടെ സ്വര്ണമാലപൊട്ടിച്ചോടിയ കേസില് യുവതി അറസ്റ്റില്. ചമല് പൂവന്മല വാണിയപുറായില് വി.എസ്. ആതിരയെന്ന ചിന്നു(26)വിനെയാണ് എസ്ഐ എം.പി. വിഷ്ണുവിന്റെ നേതൃത്വത്തില് താമരശ്ശേരി പോലീസ് അറസ്റ്റുചെയ്തത്. അയല്വാസിയായ ചമല് പൂവന്മല പുഷ്പവല്ലി(63)യെ ആക്രമിച്ച് രണ്ടുപവന് സ്വര്ണമാല പൊട്ടിച്ച് കവര്ന്നെന്ന പരാതിയിലാണ് നടപടി.
ഇക്കഴിഞ്ഞ ശനിയാഴ്ച രാവിലെ എട്ടരയോടെയായിരുന്നു സംഭവം. ഒറ്റയ്ക്കുതാമസിച്ചുവരുന്ന പുഷ്പവല്ലി വീടിന്റെ വരാന്തയിലിരുന്ന് പ്രഭാതഭക്ഷണം കഴിച്ചുകൊണ്ടിരിക്കെ, പുറകിലൂടെയെത്തിയ പ്രതി ആക്രമിച്ചെന്നാണ് പരാതി. സിറ്റൗട്ടില് മുളകുപൊടിവിതറി വീട്ടമ്മയുടെ കണ്ണും മുഖവും ബലമായി പൊത്തിപ്പിടിച്ച് തടഞ്ഞുവെക്കുകയും വലിച്ചിഴച്ച് ഡൈനിങ് ഹാളിലേക്ക് കൊണ്ടുപോവാന് ശ്രമിക്കുകയുമായിരുന്നു.
കഴുത്തിലെ സ്വര്ണമാല കവരാന്ശ്രമിക്കവെ പുഷ്പവല്ലി ബഹളംവെച്ചതുകേട്ട് സമീപവാസിയായ മറ്റൊരുയുവതി അവിടേക്ക് ഓടിയെത്തി. അതോടെ പുഷ്പവല്ലിയുടെ കഴുത്തിലെ സ്വര്ണമാല വലിച്ചുപൊട്ടിച്ച് നല്ലൊരുഭാഗം കൈക്കലാക്കിയശേഷം പ്രതി വീടിനകത്തേക്കുകയറി അടുക്കളവാതില്വഴി പുറത്തേക്കോടി രക്ഷപ്പെടുകയായിരുന്നു. കവര്ച്ചശ്രമത്തെ പ്രതിരോധിക്കുന്നതിനിടെ കഴുത്തിന് പരിക്കേറ്റ പുഷ്പവല്ലി പിന്നീട് താമരശ്ശേരി ഗവ. താലൂക്ക് ആശുപത്രിയില് ചികിത്സതേടി. വീട്ടമ്മയുടെ പരാതിയില് കേസെടുത്ത താമരശ്ശേരി പോലീസ് ആതിരയെ പിന്നീട് അറസ്റ്റുചെയ്യുകയായിരുന്നു.