പേരാമ്പ്ര: പേരാമ്പ്രയിൽ അജ്ഞാത ജീവിയെ കണ്ടതായി നാട്ടുകാർ. കിഴക്കൻ പേരാമ്പ്ര കൂത്താളി ഭാഗത്ത് പുലിയോട് സാദൃശ്യമുള്ള ജീവിയെ കണ്ടതായി നാട്ടുകാർ അറിയിച്ചു. പേരാമ്പ്ര മരുതോറകുന്നുമ്മൽ സ്വദേശി അനീഷിന്റെ വീട്ടുമുറ്റത്താണ് കഴിഞ്ഞ ദിവസം രാത്രി 11 മണിയോടുകൂടി പുലിയുടെ രൂപസാദൃശ്യമുള്ള ജീവിയെ കണ്ടത്. നാട്ടുകാർ പ്രദേശത്ത് തിരച്ചിൽ നടത്തിയെങ്കിലും ഒന്നും കണ്ടെത്താനായില്ല.

പുറത്ത് നിന്നും പട്ടികൾ കുരയ്ക്കുന്ന ശബ്ദം കേട്ട് ജനലിലൂടെ പുറത്തേക്ക് നോക്കിയപ്പോഴാണ് പുറത്ത് അജ്ഞാത ജീവി നിൽക്കുന്നത് കണ്ടെതെന്ന് അനീഷിൻ്റെ മകൾ അനൂജ പറഞ്ഞു. പിന്നീട് അനീഷ് വീടിന് മുകളിൽ ക​യറി നോക്കിയപ്പോൾ ദൂരേക്ക് ഓടിപോകുന്നതും കണ്ടു. സമീപത്തു നിന്നും ജീവിയുടെ കാൽപ്പാടുകളും ലഭിച്ചിട്ടുണ്ട്. ഫോറസ്റ്റ് ഉദ്യോഗസ്ഥരും പഞ്ചായത്ത്‌ അധികൃതരും സ്ഥലത്തെത്തി പരിശോധന നടത്തി.