വയനാട് :പുൽപ്പള്ളി 14-കാരിയായ വിദ്യർത്ഥിനിക്ക് നേരെ അയൽവാസിയുടെ ആസിഡ് ആക്രമണം. പുൽപ്പള്ളി മരകാവ് പ്രിയദർശിനി ഉന്നതിയിലെ മണികണ്ഠൻ്റെ മകൾ മഹാലക്ഷ്മിക്കാണ് (14) പൊള്ളലേറ്റത്. വേലിയമ്പം ദേവി വിലാസം ഹൈസ്കൂൾ വിദ്യാർത്ഥിനിയാണ്. ഇന്നലെ സന്ധ്യയോടെയായിരുന്നു സംഭവം. എസ്.പി.സി യൂണിഫോം ആവശ്യപ്പെട്ടപ്പോൾ കുട്ടി നൽകാൻ തയ്യാറാകാത്തതിലുള്ള വിരോധമാണ് ആക്രമണത്തിന് കാരണമെന്ന് പോലീസ് പറഞ്ഞു. ഗുരുതരമായി പൊള്ളലേറ്റ കുട്ടിയെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. സംഭവത്തിൽ അയൽവാസി രാജു ജോസിനെ പോലീസ് അറസ്റ്റ് ചെയ്തു.