മലപ്പുറം: മഞ്ചേരി മെഡിക്കൽ കോളജിൽ നഴ്‌സിംഗ് വിദ്യാർഥികളുടെ പ്രതിഷേധം.കോളജിന് സ്വന്തമായി കെട്ടിടവും ഹോസ്റ്റൽ സൗകര്യവും ഏർപ്പെടുത്തണമെന്ന് ആവശ്യപ്പെട്ടാണ് വിദ്യാർഥികൾ പ്രതിഷേധവും നിരാഹാര സമരവും നടത്തിയത്. നാല് വർഷം മുൻപ് പ്രവർത്തനമാരംഭിച്ച കോളജിന് ഇപ്പോഴും സ്വന്തമായി കെട്ടിടമില്ല .

നാല് ബാച്ചുകളിലായി 240 വിദ്യാർഥികളാണുള്ളത്. എന്നാൽ നാല് ബാച്ചുകൾക്കായി രണ്ട് ക്ലാസ്‌മുറികൾ മാത്രമാണുള്ളത്. നഴ്സിംഗ് വിദ്യാർഥികളുടെ താമസം എംബിബിഎസ് വിദ്യാർഥികളുടെ ഹോസ്റ്റലിലാണ്. ഒരു റൂമിൽ ആറുപേർ വരെ താമസിക്കുന്നതായും പരാതിയുണ്ട്.

നഴ്സിംഗ് കോളേജിനും നഴ്‌സിംഗ് സ്കൂളിനുമായി നേരത്തെ ചെരണിയിൽ അഞ്ച് ഏക്കർ സ്ഥലം ഏറ്റെടുത്തിരുന്നു. ചെരിവ് മൂലം, പ്രദേശം നിർമാണ പ്രവർത്തനത്തിന് അനുയോജ്യമല്ലെന്ന് പൊതുമരാമത്ത് വകുപ്പ് റിപ്പോർട്ട് നൽകിയതോടെ പണി മുടങ്ങി.

സൗകര്യങ്ങൾ നൽകാമെന്ന് രേഖാമൂലം ഉറപ്പുനൽകിയാൽ മാത്രമേ പ്രതിഷേധം അവസാനിപ്പിക്കൂ എന്ന നിലപാടിലാണ് വിദ്യാർഥികൾ.