തിരുവനന്തപുരം: സംസ്ഥാന ഉന്നതവിദ്യാഭ്യാസ കൗൺസിൽ ബിരുദ, പിജി പഠനത്തിനു നൽകുന്ന സ്കോളർഷിപ്പിന് 2026 ഫെബ്രുവരി 28 വരെ അപേക്ഷിക്കാം. സയൻസ്/ സോഷ്യൽ സയൻസ്/ ഹ്യുമാനിറ്റീസ്/ ബിസിനസ് സ്റ്റഡീസ് വിഷയങ്ങളിൽ കേരളത്തിലെ സർക്കാർ/ എയ്ഡഡ് ആർട്സ് ആൻഡ് സയൻസ് കോളജുകളിൽ നിലവിൽ ഒന്നാം വർഷം പഠിക്കുന്ന വിദ്യാർഥികൾക്ക് അപേക്ഷിക്കാം. ഐഎച്ച്ആർഡി അപ്ലൈഡ് സയൻസ് കോളജുകളിൽ ഒന്നാം വർഷം പഠിക്കുന്നവരും അർഹരാണ്. 12–ാം ക്ലാസിലെ മാർക്കിന്റെ അടിസ്ഥാനത്തിലാണ് തിരഞ്ഞെടുപ്പ്.

ഒരിക്കൽ തിരഞ്ഞെടുക്കപ്പെട്ടാൽ ബിരുദപഠന കാലത്ത് എല്ലാ വർഷവും പിജി കാലയളവിലും സ്കോളർഷിപ് ലഭിക്കും. ഓരോ വർഷവും പുതുക്കാനുള്ള അപേക്ഷ കൊടുക്കണം. അക്കാദമിക് മികവ് വിലയിരുത്തിയാണു പുതുക്കുക. പിജി ഒന്നാം വർഷ വിദ്യാർഥികൾക്ക് പുതുതായി അപേക്ഷിക്കാൻ സാധിക്കില്ല.

*തുക ഇങ്ങനെ*

ബിരുദ പഠനത്തിന്
ഒന്നാം വർഷം – 12,000
രണ്ടാം വർഷം – 18,000
മൂന്നാം വർഷം – 24,000
നാലാം വർഷം (ഉണ്ടെങ്കിൽ) – 40,000

പിജി പഠനത്തിന്
ഒന്നാം വർഷം – 40,000
രണ്ടാം വർഷം – 60,000

*അപേക്ഷിക്കേണ്ടത് എങ്ങനെ?∙*
scholarship.kshec.kerala.gov.in എന്ന വെബ്സൈറ്റിൽ വൺ ടൈം റജിസ്ട്രേഷൻ നടത്തുക.

• സ്റ്റുഡന്റ് ലോഗിൻ വഴി യോഗ്യതയും മറ്റ് ആവശ്യമായ വിവരങ്ങളും പൂരിപ്പിച്ചു സബ്മിറ്റ് ചെയ്യുക.

• സബ്മിറ്റഡ് ആപ്ലിക്കേഷൻസ് എന്ന ഓപ്ഷൻ വഴി അപേക്ഷയുടെ പ്രിന്റൗട്ട് എടുക്കുക.

• അപേക്ഷയുടെ പകർപ്പ്, അതിൽ പറയുന്ന രേഖകൾ സഹിതം, പഠിക്കുന്ന കോളജ് മേധാവിക്കു സമർപ്പിക്കുക.

ഒന്നാം വർഷം പഠിക്കുന്ന 1000 വിദ്യാർഥികളെയാണ് സ്കോളർഷിപ്പിനായി തിരഞ്ഞെടുക്കുന്നത്. ഓരോ സർവകലാശാലയിലും ഓരോ സ്ട്രീമിലും അനുവദിച്ചിട്ടുള്ള ആകെ സീറ്റുകൾക്ക് ആനുപാതികമായിട്ടാണു വിതരണം. പൊതുവിഭാഗം –50%, ഒബിസി -27%, പട്ടികജാതി/ വർഗം – 10%, ബിപിഎൽ വിഭാഗം - 10%, ഭിന്നശേഷി - 3% എന്നിങ്ങനെയാണ് സ്കോളർഷിപ് വിതരണം ചെയ്യുന്നത്.

പ്രഫഷനൽ കോഴ്സുകളിൽ പഠിക്കുന്ന വിദ്യാർഥികൾക്കും സ്വകാര്യ ആർട്സ് ആൻഡ് സയൻസ് കോളജുകളിലും എയ്ഡഡ് കോളജുകളിലെ സെൽഫ് ഫിനാൻസിങ് കോഴ്സുകളിലും പഠിക്കുന്നവർക്ക് അപേക്ഷിക്കാൻ സാധിക്കില്ല.