കോഴിക്കോട്: കാപ്പ നിയമം ചുമത്തി നാടുകടത്തിയ പ്രതിയെ ഉത്തരവ് ലംഘിച്ചതിനെ തുടർന്ന് പൊലീസ് അറസ്റ്റ് ചെയ്തു. കോഴിക്കോട് എരഞ്ഞിക്കൽ കണ്ടംകുളങ്ങര സ്വദേശി കഴുങ്ങിൽ ഷൈജു(52) ആണ് പിടിയിലായത്. കാപ്പ ചുമത്തി നാടുകടത്തിയിരുന്ന ഇയാളെ സ്വദേശത്തിനടുത്ത് എരഞ്ഞിക്കലിൽ നിന്നാണ് അറസ്റ്റ് ചെയ്തത്. സാമൂഹ്യവിരുദ്ധ പ്രവർത്തനങ്ങൾ നടത്തിയതിന് 2025 ജൂലൈ 27നാണ് ഇയാളെ കാപ്പ നിയമപ്രകാരം നാടുകടത്തിയത്.

ഒരു വർഷത്തേക്ക് നാടുകടത്താനാണ് ഡിഐജി ഉത്തരവിട്ടത്. എന്നാൽ എലത്തൂർ പൊലീസ് നൈറ്റ് പട്രോളിംഗ് നടത്തുന്നതിനിടെ പുലർച്ചെ 12.30 ഓടെ ഇയാളെ കണ്ടംകുളങ്ങര മസ്ജിദിന് സമീപം ദുരൂഹ സാഹചര്യത്തിൽ കാണുകയും കസ്റ്റഡിയിൽ എടുക്കുകയുമായിരുന്നു. പിന്നീടാണ് കാപ്പ കേസ് പ്രതിയാണെന്ന് വ്യക്തമായത്. എസ്ഐ ഹരീഷ് കുമാർ, സിപിഒ 'ബൈജു എന്നിവരാണ് ഇയാളെ കസ്റ്റഡിയിൽ എടുത്തത്. പിന്നീട് കാപ്പ നിയമലംഘന കേസ് കൂടി രജിസ്റ്റർ ചെയ്ത് ഇയാളെ കോടതിയിൽ ഹാജരാക്കി.