റിയാദ്: രാജ്യത്തിന്റെ വിവിധ ഭാഗങ്ങളിൽ ശക്തമായ പൊടിക്കാറ്റിന് സാധ്യതയുണ്ടെന്ന്  മുന്നറിയിപ്പ് നൽകി സഊദി നാഷണൽ സെന്റർ ഫോർ മെറ്ററോളജി. കാഴ്ചപരിമിതി ഗണ്യമായി കുറയാൻ ഇടയുള്ളതിനാൽ യാത്രക്കാരും വാഹനമോടിക്കുന്നവരും പ്രത്യേക ജാഗ്രത പാലിക്കണമെന്ന് അധികൃതർ അറിയിച്ചു.

കൂടാതെ കിഴക്കൻ പ്രവിശ്യയിലെ ജുബൈൽ, ഖോബാർ, ദമ്മാം, റാസ് തനുറ ഉൾപ്പെടെയുള്ള പ്രദേശങ്ങളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്.
പുലർച്ചെ ആരംഭിച്ച മുന്നറിയിപ്പ് വൈകിട്ട് വരെ തുടരുമെന്നാണ് റിപ്പോർട്ട്. അതേസമയം ടാബുക് റീജിയണിലെ അൽ വജ്ഹ്, ഉംല്യൂജെ   എന്നിവിടങ്ങളിലും ശക്തമായ പൊടിക്കാറ്റിന് സാധ്യതയുണ്ട്. ചില പ്രദേശങ്ങളിൽ കാഴ്ചപരിമിതി വളരെ അധികം കുറഞ്ഞതായും അധികൃതർ അറിയിച്ചു.

മിതമായ കാലാവസ്ഥാ വ്യതിയാനം സൂചിപ്പിക്കുന്ന യെല്ലോ അലർട്ട് നോർത്തേൺ ബോർഡേഴ്സ് റീജിയൻ ,അൽ ജൗഫ് റീജിയൻ, മദിനഹ്  റീജിയൻ എന്നീ മേഖലകളിൽ പ്രഖ്യാപിച്ചിട്ടുണ്ട്. ഈ പ്രദേശങ്ങളിൽ കാഴ്ചദൂരം 3 മുതൽ 5 കിലോമീറ്റർ വരെ കുറയാനാണ് സാധ്യത.

കാലാവസ്ഥാ വ്യതിയാനം തുടരുന്നതിനാൽ  ഔദ്യോഗിക അറിയിപ്പുകൾ പിന്തുടരുകയും യാത്രകളിൽ അതീവ ജാഗ്രത പുലർത്തണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.