കോഴിക്കോട്: ടൗണ് സ്റ്റേഷന് ഗ്രേഡ് എസ്.ഐ പി.ഷാഫിയെ പട്ടാപ്പകല് കത്തികൊണ്ട് കുത്തി പരിക്കേല്പ്പിച്ച കേസില് അറസ്റ്റിലായ വി.പ്രമോദിന് പൊലീസുകാരോട് വൈരാഗ്യമുണ്ടായിരുന്നെന്ന് ചോദ്യം ചെയ്യലില് വ്യക്തമായതായി പൊലീസ്. മറ്റു നാല് പോലീസ് ഉദ്യോഗസ്ഥരെക്കൂടി വധിക്കാന് തനിക്ക് പദ്ധതിയുണ്ടായിരുന്നതായി പ്രതി പോലീസിന് മൊഴി നല്കിയിട്ടുണ്ട്. മുന്പ് തന്നെ കസ്റ്റഡിയിലെടുത്ത് മര്ദിച്ചതില് പങ്കുണ്ടെന്ന് ആരോപിച്ച് ചില ഉദ്യോഗസ്ഥരുടെ പേരുകള് ഇയാള് എടുത്തുപറയുകയും ചെയ്തു.
2019-ല് ഒരു സംഘടനയുടെ പോസ്റ്റര് ഒട്ടിക്കുന്നതിനിടെ തന്നെ കസ്റ്റഡിയിലെടുത്ത ഉദ്യോഗസ്ഥരോടാണ് പ്രതിക്ക് പകയുള്ളത്. ഇവര്ക്കെതിരെ നടപടി ആവശ്യപ്പെട്ട് മുന്പ് മുഖ്യമന്ത്രിക്ക് പരാതി നല്കിയിരുന്നതായും ഇയാള് വെളിപ്പെടുത്തി.
ഹോട്ടല് ജീവനക്കാരനുമായുള്ള തര്ക്കത്തിനിടെ ഇടപെട്ടതിനാണ് എസ്.ഐക്കെതിരെ അക്രമമുണ്ടായത്. കോടതി രണ്ടാഴ്ചത്തേക്ക് റിമാന്ഡ് ചെയ്തു. കൊലപാതക ശ്രമത്തിനാണ് ഇയാളുടെ പേരില് കേസെടുത്തിട്ടുള്ളത്. കൊലപാതകശ്രമത്തിന് കേസെടുത്ത പ്രതിയെ കോഴിക്കോട് ജില്ലാ ജയിലിലേക്കാണ് മാറ്റിയത്.
പ്രതിയായ പ്രമോദ് മുമ്പും സമാനമായ നിരവധി അക്രമ സംഭവങ്ങളില് ഉള്പ്പെട്ടിട്ടുള്ള വ്യക്തിയാണ്. 2017 മുതല് നഗരത്തിലെ വിവിധ സ്റ്റേഷനുകളിലായി എട്ടോളം കേസുകള് ഇയാള്ക്കെതിരെയുണ്ട്.
കെ.എസ്.ആര്.ടി.സി കണ്ടക്ടറെ മര്ദിച്ചതും ബൈക്ക് യാത്രക്കാരനെ ആക്രമിച്ചതും ഇതില് ചിലതാണ്. സംഭവസ്ഥലത്ത് ഫോറന്സിക് വിദഗ്ധര് പരിശോധന പൂര്ത്തിയാക്കി. പോലീസിനെതിരെ ആസൂത്രിതമായ നീക്കങ്ങള് നടന്നോ എന്ന കാര്യത്തില് കൂടുതല് അന്വേഷണം നടന്നുവരികയാണ്.