പേരാമ്പ്ര: സി.കെ.ജി സ്മാരക ഗവ. കോളേജില് സ്പോര്ട്സ് ഡേയ്ക്കിടെ വിദ്യാര്ഥികള് തമ്മില് സംഘര്ഷം. എസ്.എഫ്.ഐ യൂണിറ്റ് ഭാരവാഹികളെ ഒരു സംഘം മര്ദ്ദിച്ചതായി പരാതി. എസ്.എഫ്.ഐ യൂണിറ്റ് സെക്രട്ടറി ആദിഷിന് ആക്രമണത്തില് പരിക്കേറ്റിട്ടുണ്ട്.
കോളേജില് ഇന്നലെ നടന്ന സ്പോര്ട്സ് ഡേ തടസ്സപ്പെടുത്താന് ക്യാമ്പസ്സിലെ ഒരു പറ്റം വിദ്യാര്ത്ഥികള് ഉള്പ്പെട്ട ക്രിമിനല് സംഘം മനപൂര്വ്വം പ്രശ്നങ്ങള് സൃഷ്ടിക്കുകയായിരുന്നുവെന്ന് എസ്.എഫ്.ഐ ആരോപിച്ചു. കായിക മത്സരങ്ങള്ക്കിടെ ഉണ്ടായ തര്ക്കത്തെത്തുടര്ന്ന് സംഘടിച്ചെത്തിയ സംഘം ആദിഷിനെ മര്ദ്ദിക്കുകയായിരുന്നെന്നാണ് എസ്.എഫ്.ഐ ആരോപിക്കുന്നത്.
പരിക്കേറ്റ ആദിഷിനെ പേരാമ്പ്ര തലൂക്ക് ആശുപത്രിയില് പ്രവേശിപ്പിച്ചു. ക്യാമ്പസ്സിന്റെ സമാധാന അന്തരീക്ഷം തകര്ക്കാനും വിദ്യാര്ത്ഥികള്ക്കിടയില് ഭീതി പടര്ത്താനുമാണ് ഇത്തരം ഗ്യാങ് അരാജകത്വ പ്രവര്ത്തനങ്ങള് വഴി ലക്ഷ്യമിടുന്നതെന്ന് എസ്.എഫ്.ഐ സി.കെ.ജി യൂണിറ്റ് കമ്മിറ്റി പ്രസ്താവനയില് പറഞ്ഞു. ക്യാമ്പസ്സില് അക്രമം അഴിച്ചുവിട്ട ക്രിമിനല് സംഘത്തിനെതിരെ അധികൃതര് കര്ശന നടപടി സ്വീകരിക്കണമെന്നും, ഇത്തരം ഗുണ്ടാ പ്രവര്ത്തനങ്ങള്ക്കെതിരെ വിദ്യാര്ത്ഥി സമൂഹം ഒറ്റക്കെട്ടായി രംഗത്തിറങ്ങണമെന്നും യൂണിറ്റ് കമ്മിറ്റി ആവശ്യപ്പെട്ടു.