ന്യൂഡൽഹി: രാജ്യത്തെ ബാങ്ക്​ ജീവനക്കാരുടെയും ഓഫീസർമാരുടെയും സംയുക്ത വേദിയായ യുനൈറ്റഡ്​ ഫോറം ഓഫ്​ ബാങ്ക്​ യൂനിയൻസ്​ (യുഎഫ്​ബിയു) മാർച്ച്​ 24, 25 തീയതികളിൽ രാജ്യവ്യാപകമായി പണിമുടക്കും. എല്ലാ തസ്തികയിലും ആവശ്യത്തിന്​ നിയമനവും താൽക്കാലിക ജീവനക്കാരുടെ സ്ഥിരപ്പെടുത്തലും, ആഴ്ചയിൽ അഞ്ച്​ പ്രവൃത്തി ദിനം നടപ്പാക്കുക, ജോലി സുരക്ഷിതത്വത്തിന്​ ഭീഷണിയും ഉഭയകക്ഷി ധാരണക്ക്​ വിരുദ്ധവുമായ ‘പെർഫോമൻസ്​ ലിങ്ക്​ഡ്​ ഇൻസെന്‍റീവ്​’ കേന്ദ്ര ധനമന്ത്രാലയം പിൻവലിക്കുക, ഓഫീസർമാർക്കും ജീവനക്കാർക്കും ആക്രമണങ്ങളിൽ നിന്ന്​ സുരക്ഷിതത്വം ഉറപ്പാക്കുക, പൊതുമേഖല ബാങ്ക്​ ഡയറക്ടർ ബോർഡുകളിൽ ഓഫീസർമാരുടെയും ജീവനക്കാരുടെയും ഒഴിവ്​ നികത്തുക, ഐ.ഡി.ബി.ഐ ബാങ്കിൽ 51 ശതമാനം ഓഹരി കേ​ന്ദ്ര സർക്കാർ നിലനിർത്തുക തുടങ്ങി വിവിധ ആവശ്യങ്ങൾ ഉന്നയിച്ചാണ്​ പണിമുടക്കുന്നത്.

സ്ഥിരം ജോലികളുടെ പുറംകരാർ വത്​കരണം, ബാങ്കിങ്​ വ്യവസായത്തിലെ അന്യായമായ തൊഴിൽ രീതികൾ, ഓഫീസർമാരുടെയും ജീവനക്കാരുടെയും സേവന വ്യവസ്ഥകളെ പ്രതികൂലമായി ബാധിക്കുന്ന കേന്ദ്ര ധനമന്ത്രാലയത്തിന്‍റെ ഇടപെടൽ എന്നിവക്ക്​ എതിരെ കൂടിയാണ്​ പണിമുടക്ക്​. പണിമുടക്കിന്​ മുന്നോടിയായുള്ള പ്രതിഷേധ പരിപാടികൾ വെള്ളിയാഴ്ച തുടങ്ങി. ഈമാസം 28ന്​ എല്ലാവരും ബാഡ്ജ്​ ധരിച്ചാണ്​ ജോലിക്കെത്തുക. അടുത്തമാസം അഞ്ചിന്​ ഇന്ത്യൻ ബാങ്ക്​സ്​ അസോസിയേഷൻ കേന്ദ്ര ധനമന്ത്രാലയത്തിന്‍റെ ധനകാര്യ സേവന വിഭാഗം, കേന്ദ്ര ലേബർ കമീഷൻ എന്നിവക്ക്​ പണിമുടക്ക്​ നോട്ടീസ്​ നൽകും. യുഎഫ്ബിയുവിന്‍റെ കുടക്കീഴിലുള്ള ഒമ്പത്​ സംഘടനകളും ചേർന്നാണ്​ പണിമുടക്കുന്നത്​.