റിയാദ്:മിനി ട്രക്ക് ട്രെയിലറിന്​ പിന്നിലിടിച്ച്​ സൗദിയിൽ മലയാളി യുവാവ്​ മരിച്ചു. സൗദി കിഴക്കൻ പ്രവിശ്യയിലെ അൽ അഹ്​സയിലേക്ക്​ റിയാദിൽനിന്നുള്ള യാത്രാമധ്യേ പഴയ ഖുറൈസ്​ പട്ടണത്തിൽവെച്ചുണ്ടായ അപകടത്തിൽ മലപ്പുറം നിലമ്പൂർ പയ്യമ്പള്ളി, മുക്കട്ട വയൽ സ്വദേശി കാരാട്ടുപറമ്പിൽ ഹൗസിൽ അക്​ബർ (37) ആണ്​ മരിച്ചത്​._

വെള്ളിയാഴ്​ച ജുമുഅക്ക്​​ തൊട്ടുമുമ്പാണ്​ അപകടം. വാഹനങ്ങളുടെ ഫിൽട്ടർ ബിസിനസിലേർപ്പെട്ട റിയാദിലെ അലൂബ് കമ്പനിയുടെ സെയിൽസ്​മാനായ അക്​ബർ അൽഅഹ്​സ മേഖലയിലാണ്​ ജോലി ചെയ്​തിരുന്നത്​

കമ്പനി ഗോഡൗണിൽനിന്ന്​ മിനി ട്രക്കിൽ ലോഡുമായി പോകവെ, പഴയ ഖുറൈസ്​ പട്ടണത്തിൽ വെച്ച്​ ഹൈവേയിൽനിന്ന്​ ബ്രാഞ്ച്​ റോഡിലേക്ക്​ അ​പ്രതീക്ഷിതമായി തിരിഞ്ഞ ട്രെയിലറിന്​ പിന്നിൽ ഇടിച്ചായിരുന്നു അപകടം. ഇടിയുടെ ആഘാതത്തിൽ തകർന്ന വാഹനത്തിനുള്ളിൽ കുടുങ്ങിയ​ അക്​ബർ തൽക്ഷണം മരിച്ചു.

നാലു മാസം മുമ്പ്​ സന്ദർശന വിസയിലെത്തിയ ഭാര്യയും രണ്ട്​ മക്കളുമടങ്ങുന്ന കുടുംബം അൽ അഹ്​സയിലുണ്ടായിരുന്നു. അവരെ കമ്പനിയധികൃതർ ശനിയാഴ്​ച നാട്ടിലേക്ക്​ കയറ്റിവിട്ടു. ഭാര്യ: ഫസ്​ന പാറശ്ശേരി, മക്കൾ: ഫാതിമ നൈറ (ഒമ്പത്​), മുഹമ്മദ്​ ഹെമിൻ (രണ്ട്​). പരേതനായ കാരാട്ടുപറമ്പിൽ ഹസനാണ്​ പിതാവ്​. മാതാവ്​: സക്കീന ഉമ്മ, സഹോദരങ്ങൾ: ജാഫർ, റഹ്​മാബി.

അലൂബ്​ കമ്പനി മാനേജിങ്​ ഡയറക്​ടറും മലയാളിയുമായ അഷ്​റഫ്​ എറമ്പത്ത് അപകട വിവരമറിഞ്ഞ്​ അൽ അഹ്​സയിലെത്തി അനന്തര നടപടികൾക്ക്​ നേതൃത്വം നൽകുന്നു. മരണാനന്തര നിയമനടപടികൾ പൂർത്തീകരിക്കാനും മൃതദേഹം നാട്ടിലെത്തിക്കാനുമുള്ള പ്രവർത്തനങ്ങളുമായി കെ.എം.സി.സി അൽ അഹ്​സ ഘടകം ഭാരവാഹി നാസർ കണ്ണൂരും സഹപ്രവർത്തകരും​ കമ്പനി പ്രതിനിധി നാസർ വണ്ടൂരും ഒപ്പമുണ്ട്​.