കോഴിക്കോട്):കക്കട്ടിൽ ടൗണിൽ വയോധികന്​ വെട്ടേറ്റ സംഭവത്തിൽ കൂടുതൽ വിവരങ്ങൾ പുറത്ത്. മധുകുന്ന്​ പുന്നൂപ്പറമ്പത്ത്​ ഗംഗാധരനാണ്​ (65) വെട്ടേറ്റത്. മഴക്കോട്ടു കൊണ്ട്​ മുഖം മറച്ച്​ കൊടുവാൾ പൊതിഞ്ഞു കെട്ടി വന്നയാൾ പൊടുന്നനെ വെട്ടുകയായിരുന്നെന്ന് ഗംഗാധരൻ​ പൊലീസിനോട്​ പറഞ്ഞു.

തിങ്കളാഴ്ച വൈകീട്ട്​ കൈവേലി റോഡിന്​ സമീപം നിൽക്കുമ്പോഴാണ് വയോധികന് കൊടുവാൾ കൊണ്ട്​ വെട്ടേറ്റത്​. തോളിനും കാലിനും വെട്ടേറ്റ ഇയാളെ കോഴിക്കോട്​ മെഡിക്കൽ കോളേജ്​ ആശുപത്രിയിൽ പ്രവേശിപ്പിച്ചു. കുറ്റ്യാടി പൊലീസ്​ ഗംഗാധാരന്റെ മൊഴിയെടുത്തു.

ഗംഗാധരന്റെ ബന്ധുവിന്റെ വീട്ടിൽ സി.പി.എം ബ്രാഞ്ച്​ കമ്മിറ്റി യോഗം നടത്തിയതുമായി ബന്ധപ്പെട്ട്​ നേരത്തെ നടന്ന തർക്കങ്ങളും അടിപിടിയുമാണ്​ അക്രമത്തിലേക്ക്​ നയിച്ചതെന്നാണ്​ പൊലീസിന്റെ നിഗമനം. യോഗം നടത്തുന്നത്​ ഗംഗാധരനും ബി.ജെ.പി പ്രവർത്തകനായ മകൻ ലകേഷും​ എതിർത്തിരുന്നു.

തുടർന്ന്​ വാക്കേറ്റവും അടിപിടിയും ഉണ്ടായതായും മകനെതിരെ സി.പി.എമ്മുകാരുടെ പരാതി പ്രകാരം കേസെടുത്തിരുന്നതായും പൊലീസ്​ പറഞ്ഞു. ഗംഗാധരൻ മുമ്പ്​ സി.പി.എമ്മുകാരനായിരുന്നെന്നും ഇപ്പോൾ പാർട്ടിയിലില്ലെന്നും നാട്ടുകാർ പറയുന്നു. സംഭവത്തിൽ വധശ്രമത്തിന്​ കേസെടുത്ത്​ അന്വേഷണം ആരംഭിച്ചു.