മലപ്പുറം :ജമ്മുകശ്മീരിൽ വിഷം ഉള്ളിൽ ചെന്ന് യുവതി മരിച്ചതിന് പിന്നാലെ ഭർത്താവും സൈനികൻ കൂടിയായ മലപ്പുറം സ്വദേശിയും മരിച്ചു. പെരുവള്ളൂർ ഇരുമ്പൻകുടുക്ക് പാലപ്പെട്ടിപ്പാറ സ്വദേശി പള്ളിക്കര ബാലകൃഷ്ണന്റെ മകൻ നിധീഷ്(30) ആണ് മരിച്ചത്. ജമ്മുവിൽ സൈനികനായി സേവനം ചെയ്യുകയായിരുന്നു നിധീഷ്.

ശരീരത്തിൽ വിഷാംശം കണ്ടെത്തിയതിനെ തുടർന്ന് ഗുരുതരാവസ്ഥയിൽ ജമ്മുവിലെ സൈനിക ആശുപത്രിയിൽ ചികിത്സയിൽ കഴിയുന്നതിനിടയിലാണ് നിതീഷിൻ്റെ മരണം സംഭവിച്ചത്. ജമ്മു കശ്മ‌ീരിൽ നിധീഷിനൊപ്പം കഴിഞ്ഞിരുന്ന ഭാര്യ റിൻഷ (24) സാമാന സാഹചര്യത്തിൽ കഴിഞ്ഞ ചൊവ്വാഴ്ച മരിച്ചിരുന്നു. ഇവരുടെ മൃതദേഹം ഇന്നലെ പുലർച്ചെയോടെ നെടുമ്പാശ്ശേരി വിമാനത്താവളത്തിൽ എത്തിക്കുകയും ബന്ധുക്കൾ ഏറ്റുവാങ്ങുകയും ചെയ്തിരുന്നു.

സംസ്‌കാര ചടങ്ങുകൾ നടക്കുന്നതിനിടയിലാണ് നിധീഷിൻ്റെ വിയോഗ വാർത്ത എത്തിയത്. കഴിഞ്ഞ ജനുവരിയിലാണ് നിധീഷ് നാട്ടിൽ ലീവിൽ വന്നു മടങ്ങിയത്. മടങ്ങുമ്പോൾ റിൻഷയെയും ഒപ്പം കൂട്ടുകയായിരുന്നു.

ജമ്മുവിലെ സാംപ എന്ന സ്ഥലത്തെ ക്വാർട്ടേഴ്‌സിൽ വിഷം അകത്തുചെന്ന നിലയിലാണ് ഇരുവരെയും കണ്ടെത്തിയത്. കണ്ണൂർ പിണറായി സ്വദേശികളായ തയ്യിൽ വസന്തയുടെയും പരേതനായ സുരാജന്റെയും മകളാണ് റിൻഷ നിധീഷിന്റെ മൃതദേഹം നാളെ നാട്ടിൽ എത്തിക്കുമെന്നാണ് ലഭിക്കുന്ന വിവരം