കോഴിക്കോട്:കോഴിക്കോട് മൂന്നര വയസ്സുള്ള പെൺകുഞ്ഞിനെ മെഡിക്കൽ കോളേജിൽ ഉപേക്ഷിച്ച് അമ്മ കടന്നുകളഞ്ഞ സംഭവത്തിൽ ആന്ധ്രാ സ്വദേശിനിക്കെതിരെ ആരോപണവുമായി ബന്ധു.

കുട്ടിയെ യുവതി ഉപദ്രവിച്ചിരുന്നുവെന്നാണ് പിതൃസഹോദരിയുടെ ആരോപണം. രണ്ടാമത്തെ കുഞ്ഞിനെ വിറ്റതായും പരാതിയിൽ പറയുന്നു. മാനന്തവാടി പൊലീസിലാണ് പിതൃസഹോദരി പരാതി നൽകിയത്.കുട്ടികളുടെ അമ്മ എവിടെയാണെന്ന് ഇപ്പോഴും അറിയില്ലെന്നും സ്വന്തമായി ഫോൺ നമ്പറില്ലെന്നും പിതൃസഹോദരി പറയുന്നു. ഒരു ഫോണിൽ നിന്നും വല്ലപ്പോഴും വിളിക്കുകയാണ് ചെയ്യുന്നത്. രണ്ടാമത്തെ കുട്ടിയെക്കുറിച്ച് അന്വേഷിക്കുമ്പോൾ 6,000 രൂപ കൊടുത്താൽ കിട്ടുമെന്നാണ് യുവതി നൽകുന്ന മറുപടിയെന്നുമാണ് വിവരം.

കുട്ടിയുടെ അച്ഛൻ മാനന്തവാടി സ്വദേശി നേരത്തെ മരിച്ചിരുന്നു. ആന്ധ്ര സ്വദേശിയായ യുവതിയെ മാനന്തവാടി സ്വദേശി വിവാഹം ചെയ്ത് കൊണ്ടുവരികയായിരുന്നു. രണ്ട് കുട്ടികളാണുള്ളത്. സംഭവത്തിൽ പൊലീസ് അന്വേഷണം പുരോഗമിക്കുകയാണ്.ആശുപത്രിയിൽ ഉപേക്ഷിച്ച കുട്ടിയ്ക്ക് സാരമായ പരിക്കുകളുണ്ടെന്നും പിതൃസഹോദരി ആരോപിച്ചു. 'കുഞ്ഞിന്റെ കൈകൾക്കും പരിക്കേറ്റിട്ടുണ്ട്. തലയിൽ ചെറിയ രീതിയിൽ രക്തം കട്ടപിടിച്ചതായാണ് വിവരം. അതിനാൽ കുഞ്ഞിന് ശാരീരിക പ്രശ്ന‌ങ്ങളുണ്ട്.

കാഴ്ച കുറവുണ്ട്. വയറിന് എന്തോ അസുഖമുണ്ട്. തലയിൽ രക്തം കട്ടയായി. അതുകൊണ്ട് നല്ല ചികിത്സനൽകണമെന്നാണ് പറയുന്നത്. എന്താണ് സംഭവിച്ചതെന്നതിനെ കുറിച്ച് കുട്ടികളുടെ മാതാവ് സത്യം പറയുന്നില്ല, ആശുപത്രിയിൽ കൊണ്ടുവിട്ടിട്ട് പോയി. പിന്നീട് വിളിച്ചിട്ട് എടുക്കുന്നില്ല. ഡോക്ട‌ർ ചോദിച്ചിട്ടും ഞങ്ങൾ ചോദിച്ചിട്ടും കൃത്യമായ മറുപടി നൽകുന്നില്ല. സത്യം എന്താണെന്ന് അറിയില്ല.', പിതൃസഹോദരി പറഞ്ഞു