കൊച്ചി: ശിരോവസ്ത്രം ധരിച്ചതിന്റെ പേരില്‍ എട്ടാം ക്ലാസ് വിദ്യാര്‍ഥിനിയെ ക്ലാസില്‍ കയറ്റാതെ പുറത്തുനിര്‍ത്തിയ സംഭവത്തില്‍ പ്രതികരണവുമായി സ്കൂള് അധികൃതര്‍. സംഭവത്തില്‍ എറണാകുളം വിദ്യാഭ്യാസ ഉപഡയറക്ടറുടെ അന്വേഷണ റിപ്പോര്‍ട്ട് സത്യവിരുദ്ധമാണെന്ന് സെന്റ് റീത്താസ് സ്കൂള് പ്രിന്‍സിപ്പല്‍ സിസ്റ്റര്‍ ഹെലീന ആല്‍ബിന്‍ കുറ്റപ്പെടുത്തി. എല്ലാ തെളിവുകളും സ്കൂള് മാനേജ്‌മെന്റിന്റെ കൈയിലുണ്ടെന്നും അവര്‍ കൂട്ടിച്ചേര്‍ത്തു.
ഞങ്ങള്‍ കുട്ടിയെ പുറത്താക്കിയിട്ടില്ല.ഇപ്പോഴും കുട്ടി സ്കൂളിലെ വിദ്യാര്‍ഥിനിയാണ്. കോടതിയുടെ നിര്‍ദേശം അനുസരിച്ചാണ് സ്കൂള് പ്രവര്‍ത്തിക്കുന്നത്. സ്‌കൂളിന്റെ നിയമത്തിനനുസരിച്ച് പ്രവര്‍ത്തിക്കും എന്നാണ് കഴിഞ്ഞദിവസം കുട്ടിയുടെ പിതാവ് പറഞ്ഞത്.അദ്ദേഹത്തെ ഉടന്‍ തന്നെ മാനേജ്‌മെന്റ് കാണും പ്രിന്‍സിപ്പല്‍ പറഞ്ഞു.
വിദ്യാഭ്യാസ മന്ത്രിയുടെ നടപടിക്കെതിരെ ഹൈക്കോടതിയെ സമീപിക്കുമെന്നും അവര്‍ പ്രതികരിച്ചു. മന്ത്രി കാര്യങ്ങള്‍ പഠിക്കാതെയാണ് പ്രതികരിക്കുന്നത്. യൂനിഫോം സ്കൂളിന് നിശ്ചയിക്കാമെന്നത് കോടതി ഉത്തരവാണെന്നും പ്രിന്‍സിപ്പല്‍ ഹെലീന ആല്‍ബിന്‍ കൂട്ടിച്ചേര്‍ത്തു.
വിദ്യാഭ്യാസ മന്ത്രിയും വകുപ്പും കാര്യങ്ങള്‍ പഠിച്ചിട്ടില്ലെന്നും മന്ത്രി നിലപാട് തിരുത്തണമെന്നും അഭിഭാഷക വിമല ബിനുവും പറഞ്ഞു. 'കുട്ടിയെ സ്‌കൂളില്‍ നിന്ന് കൊണ്ടുപോകാന്‍ താല്‍പര്യമില്ലെന്ന് പിതാവ് പറഞ്ഞിരുന്നു. എന്റെ കുഞ്ഞിന്റെ പേര് പറഞ്ഞ് വര്‍ഗീയത ഉണ്ടാക്കാന്‍ അനുവദിക്കില്ലെന്നും പിതാവ് പറഞ്ഞിരുന്നു. കുട്ടിയെ സ്‌കൂളില്‍ നിന്ന് പറഞ്ഞിട്ടില്ല. ഹിജാബ് ധരിച്ച് എത്തിയ കുട്ടിയ ആര്‍ട്‌സ് ഡേക്ക് പങ്കെടുക്കുന്ന ദൃശ്യങ്ങളും സ്‌കൂളിന്റെ കൈയിലുണ്ട്'. അവര്‍ കൂട്ടിച്ചേര്‍ത്തു.
ശിരോവസ്ത്രം ധരിക്കാത്തതിനെ തുടര്‍ന്ന് കുട്ടിയെ പുറത്തുനിര്‍ത്തി എന്നതാണ് റിപ്പോര്‍ട്ട് ലഭിച്ചതെന്നാണ് വിദ്യാഭ്യാസ മന്ത്രി വി.ശിവന്‍കുട്ടി പ്രതികരിച്ചത്. മാനേജ്‌മെന്റിന്റെ ഭാഗം കേള്‍ക്കാനാണ് വിശദീകരണം ചോദിച്ചത്. പ്രശ്‌നം പരിഹരിച്ചെങ്കില്‍ നല്ലകാര്യം. ഇതുപോലുള്ള സംഭവം ആവര്‍ത്തിക്കാതിരിക്കണം. എന്തിന്റെ പേരിലും ഒരു കുട്ടിയുടെ വിദ്യാഭ്യാസ അവകാശം നിഷേധിക്കാന്‍ പാടില്ല. അതാണ് സര്‍ക്കാര്‍ നിലപാട്- അദ്ദേഹം പറഞ്ഞു. അതുകൊണ്ടാണ് സര്‍ക്കാര്‍ വിഷയത്തില്‍ ഇടപെട്ടതെന്നും മന്ത്രി കൂട്ടിച്ചേര്‍ത്തു.
ഏതെങ്കിലും ഒരു വിഭാഗത്തിന് പ്രത്യേക പരിഗണന കൊടുക്കുന്നത് സര്‍ക്കാര്‍ നിലപാടല്ലെന്നും മന്ത്രി വ്യക്തമാക്കി. കൊച്ചിയിലെ സംഭവം ചൂഷണം ചെയ്യാന്‍ ചിലര്‍ ശ്രമിച്ചു.അതുകൊണ്ടാണ് പ്രശ്‌നം തീരാന്‍ വേണ്ടിയുള്ള ശ്രമങ്ങളെ സര്‍ക്കാര്‍ സ്വാഗതം ചെയ്യുന്നത്. വിഷയത്തില്‍ ഹൈബി ഈഡന്‍ എം പി നടത്തിയ ഇടപെടലും സ്വാഗതം ചെയ്യുന്നു..മന്ത്രി പറഞ്ഞു.
എന്നാല്‍ പള്ളുരുത്തി സെന്റ് റീത്താസ് സ്കൂള് മാനേജ്‌മെന്റിന് ഗുരുതര വീഴ്ചയുണ്ടായെന്നാണ് വിദ്യാഭ്യാസ മന്ത്രി വി.ശിവന്‍കുട്ടി ഇന്ന് രാവിലെ പറഞ്ഞത്. സ്കൂള് ഇത്തരം കാര്യങ്ങള്‍ ആവര്‍ത്തിക്കാന്‍ പാടില്ലെന്നും പരാതി ലഭിച്ചതിനെ തുടര്‍ന്നാണ് വിഷയത്തിന്റെ അടിസ്ഥാനത്തില്‍ സര്‍ക്കാര്‍ ഇടപെട്ടതെന്നും മന്ത്രി വാര്‍ത്താസമ്മേളനത്തില്‍ അറിയിച്ചിരുന്നു.