കോഴിക്കോട്:കോഴിക്കോട്, കണ്ണൂർ ജില്ലകളിലെ രണ്ട് റെയിൽവേ സ്റ്റേഷനുകൾ നാളെ മുതൽ പ്രവർത്തിക്കില്ല. ഇവിടെ ട്രെയിൻ നിർത്തുകയുമില്ല. ഹാൾട്ട് സ്റ്റേഷനുകളായി പ്രവർത്തിച്ച കണ്ണൂരിലെ ചിറക്കൽ, കോഴിക്കോട്ടെ വെള്ളറക്കാട് റെയിൽവേ സ്റ്റേഷനുകളാണ് പൂട്ടുന്നത്. ജീവനക്കാരെ മറ്റ് സ്റ്റേഷനുകളിലേയ്ക്ക് മാറ്റി നിയമിക്കും.

ഈ സ്റ്റേഷനുകളിൽ പാസഞ്ചർ ട്രെയിനുകൾ മാത്രമാണ് നിർത്തിയിരുന്നത്. തിങ്കളാഴ്‌ച മുതൽ ഈ മാറ്റം പ്രാബല്യത്തിൽ വരും. കോഴിക്കോട് കൊയിലാണ്ടി- തിക്കോടി സ്റ്റേഷനുകൾക്കിടയിലാണ് വെള്ളറക്കാട്. കണ്ണൂർ റെയിൽവേ സ്റ്റേഷനിൽ നിന്ന് വളരെ അടുത്ത് കിടക്കുന്നതാണ് ചിറക്കൽ സ്റ്റേഷൻ.ഇവിടങ്ങളിൽ നിന്നുള്ള യാത്രക്കാർ ഇനി മുതൽ സമീപ സ്റ്റേഷനുകളായ കണ്ണൂർ, തിക്കോടി, കൊയിലാണ്ടി എന്നിവയെ ആശ്രയിക്കണം. സ്ഥിരമായി യാത്ര ചെയ്യുന്നവർക്കും പ്രദേശവാസികൾക്കും ഈ തീരുമാനം വലിയ തിരിച്ചടിയാകും. അതേസമയം, വിഷയത്തിൽ ഇടപെടണം എന്നാവശ്യപ്പെട്ട് കാനത്തിൽ ജമീല എം എൽ എ റെയിൽവേ ചുമതയലുള്ള മന്ത്രി വി അബ്‌ദുറഹ്മാന് കത്തയച്ചിട്ടുണ്ട്.