കോഴിക്കോട്: ഖത്തറിലെ കെഎംസിസി ഓഫീസിൽ നടന്ന എട്ട് കോടിയുടെ കവർച്ചാ കേസിൽ ആരോപണ വിധേയനായ പ്രമുഖ വ്യവസായി റസാഖ് റൊട്ടാനയെ മുസ്‌ലിം ലീഗിൽ നിന്ന് പുറത്താക്കി. കെഎംസിസി അടക്കമുള്ള പാർട്ടിയിലെ എല്ലാ പോഷക സംഘടനകളുടെയും ചുമതലകളിൽ നിന്നും അംഗത്വത്തിൽ നിന്നും നീക്കിയതായി സംസ്ഥാന കമ്മിറ്റി അറിയിച്ചു.
കേസിൽ പിടിയിലായ നാലാം പ്രതി ബാലകൃഷ്ണൻ നൽകിയ മൊഴിയിലും പുറത്തുവിട്ട വീഡിയോയിലും റസാഖിന്റെ പേര് പരാമർശിച്ചിരുന്നു. മുഖ്യപ്രതി ബോംബെ ഷാജിയുടെ ശബ്ദ സന്ദേശത്തിലും പേരുണ്ടായിരുന്നു. എന്നാൽ തനിക്കെതിരെ പാർട്ടിയിലെ ഒരു വിഭാഗം ഗൂഢാലോചന നടത്തുകയാണെന്നും ആരോപണങ്ങൾ അടിസ്ഥാനരഹിതമാണെന്നുമാണ് റസാഖ് റൊട്ടാനയുടെ വിശദീകരണം.
കുറ്റാരോപിതരായ ആരെയും സംരക്ഷിക്കുന്ന നിലപാട് ലീഗിന്റെ ഭാഗത്തുനിന്നുണ്ടാകില്ലെന്ന് ജനറൽ സെക്രട്ടറി പി.എം.എ സലാം വ്യക്തമാക്കിയതിന് പിന്നാലെയാണ് നടപടി.
2025 സെപ്റ്റംബർ 18നാണ് കേസിനാസ്പദമായ സംഭവം. കെഎംസിസിയുടെ അൽ തുമാമയിലെ ഓഫീസിലെ ലോക്കർ തകർത്താണ് എട്ട് കോടിയോളം രൂപ കവർന്നത്. അംഗങ്ങൾക്ക് രോഗബാധയോ മരണമോ സംഭവിച്ചാൽ സഹായം നൽകുന്ന സ്നേഹ സുരക്ഷാ പദ്ധതിക്കായി സമാഹരിച്ച തുകയായിരുന്നു ഇത്.
സംഭവത്തിൽ ഖത്തർ പൊലീസും ഗൂഢാലോചന കേന്ദ്രീകരിച്ച് കൊയിലാണ്ടി പൊലീസും അന്വേഷണം നടത്തുന്നതിനിടെയാണ് നാലാം പ്രതി ബാലകൃഷ്ണൻ കീഴടങ്ങിയത്. അറബിയുടെ വീട്ടിൽ ജോലി ഉണ്ടെന്ന് പറഞ്ഞ് ഒന്നാം പ്രതി ബോംബെ ഷാജിയാണ് തന്നെ ഖത്തറിലെത്തിച്ചതെന്നും പിന്നീട് ഭീഷണിപ്പെടുത്തി സ്ട്രോങ് റൂം ഗ്യാസ് കട്ടർ ഉപയോഗിച്ച് മുറിച്ചുമാറ്റിക്കുകയായിരുന്നുവെന്നുമാണ് ഇയാളുടെ മൊഴി.
