ഗസ :ഗസ സിറ്റിയില് ഇസ്റാഈല് ആക്രമണത്തില് തകര്ന്ന ഒരു പാര്പ്പിട സമുച്ചയത്തിന്റെ അവശിഷ്ടങ്ങള്ക്കിടയില് നിന്ന് 19 മൃതദേഹങ്ങള് കണ്ടെടുത്തതായി സിവില് ഡിഫന്സ് വിഭാഗം പ്രസ്താവനയില് അറിയിച്ചു. ഇതില് ഭൂരിഭാഗവും സ്ത്രീകളും കുട്ടികളുമാണ്.
പ്രധാനമായും മനുഷ്യധ്വാനം ഉപയോഗിച്ച് സാവധാനത്തിലാണ് തകര്ന്ന കെട്ടിടാവശിഷ്ടങ്ങള്ക്കിടയില് നിന്ന് മൃതദേഹങ്ങള് വീണ്ടെടുക്കുന്നതിനുള്ള ശ്രമങ്ങള് നടക്കുന്നത്. തകര്ന്ന കോണ്ക്രീറ്റ് അവശിഷ്ടങ്ങള് നീക്കം ചെയ്യാന് ആവശ്യമായ ഭാരമേറിയ യന്ത്രസാമഗ്രികളുടെ കടുത്ത ക്ഷാമം ഇത്തരം പ്രവര്ത്തനങ്ങള്ക്ക് തടസ്സമാകുന്നുണ്ട്.
ഗസയുടെ പടിഞ്ഞാറന് മേഖലയിലുള്ള ‘കരം’ (Karam) കെട്ടിടത്തിലെ തിരച്ചില് നാല് ദിവസത്തെ പ്രവര്ത്തനങ്ങള്ക്ക് ശേഷം അവസാനിച്ചുവെന്നാണ് രക്ഷാപ്രവര്ത്തനങ്ങള്ക്ക് നേതൃത്വം നല്കുന്ന മുഹമ്മദ് അബു ഡാന് പറഞ്ഞത്. തിരച്ചില് നടപടികള്ക്കായി വിദഗ്ധരായ മെഡിക്കല് സംഘവും സിവില് ഡിഫന്സ് ഉദ്യോഗസ്ഥരും ഗസ സിറ്റിയിലെ തന്നെ മറ്റൊരു സ്ഥലത്തേക്ക് മാറുമെന്നും അദ്ദേഹം അറിയിച്ചു.
ഇസ്രായേല് ആക്രമണങ്ങളില് തകര്ന്നുവീണ കോണ്ക്രീറ്റ് പാളികള് നീക്കം ചെയ്യാന് ശേഷിയുള്ള ഭാരമേറിയ യന്ത്രങ്ങള് ലഭ്യമല്ലാത്തതിനാല്, ലളിതമായ ഉപകരണങ്ങളെയും കഠിനമായ ശാരീരിക അധ്വാനത്തെയുമാണ് തങ്ങളുടെ സംഘം ആശ്രയിക്കുന്നതെന്ന് സിവില് ഡിഫന്സ് ഉദ്യോഗസ്ഥര് ആവര്ത്തിച്ച് വ്യക്തമാക്കുന്നുണ്ട്.
ഗസയിലെ വിവിധ ഭാഗങ്ങളിലായി കെട്ടിടാവശിഷ്ടങ്ങള്ക്കിടയില് കുടുങ്ങിപ്പോയ 8,000-ത്തിലധികം ആളുകളെ ഇനിയും കണ്ടെത്താനുണ്ടെന്ന് ഗസ ആരോഗ്യ മന്ത്രാലയം അറിയിച്ചു. കഴിഞ്ഞ വര്ഷം ഒക്ടോബര് 11-ന് വെടിനിര്ത്തല് നിലവില് വന്നതിനു ശേഷം കുറഞ്ഞത് 1,254 പേര് കൊല്ലപ്പെടുകയും 4,121 പേര്ക്ക് പരുക്കേല്ക്കുകയും ചെയ്തു. അവശിഷ്ടങ്ങള്ക്കിടയില് നിന്ന് 804 മൃതദേഹങ്ങള് കണ്ടെടുക്കുകയും ചെയ്തതായി മന്ത്രാലയത്തിന്റെ ഏറ്റവും പുതിയ കണക്കുകള് വ്യക്തമാക്കുന്നു. 2023 ഒക്ടോബര് മുതല് ആകെ മരണസംഖ്യ 73,300-ല് അധികമാണ്. പരുക്കേറ്റവരുടെ എണ്ണം 1,74,000-ത്തിലധികവും.
2023 നവംബറില് ഇസ്റാഈല് നടത്തിയ ആക്രമണത്തില് തകര്ന്ന ഗസയിലെ സാബ്ര മേഖലയിലുള്ള ഒരു പാര്പ്പിട സമുച്ചയത്തിന്റെ അവശിഷ്ടങ്ങളില് നിന്ന് കണ്ടെടുത്ത, അബു ഷാരിയ, അല്-ഹസയ്ന കുടുംബങ്ങളിലെ 112 പേരുടെ മൃതദേഹങ്ങള് കൂട്ടത്തോടെ സംസ്കരിച്ചിരുന്നു.
