കോഴിക്കോട്: കേരള പോലീസും ഡാൻസാഫും ചേർന്ന് ലഹരിമാഫിയക്കെതിരെ സംസ്ഥാനവ്യാപകമായി നടത്തുന്ന ‘ഓപ്പറേഷൻ തൂഫാൻ’ റെയ്ഡിനിടെ കോഴിക്കോട് നഗരത്തിൽ വൻ ലഹരിവേട്ട. കേസിൽ നന്മണ്ട സ്വദേശി അനന്ദു (ടോബി), പുതിയാപ്പ സ്വദേശിനി കീർത്തന എന്നിവരെ പ്രതിചേർത്ത് പോലീസ് അന്വേഷണം ഊർജ്ജിതമാക്കി.
കോഴിക്കോട് നഗരത്തിൽ രഹസ്യവിവരത്തിന്റെ അടിസ്ഥാനത്തിൽ പോലീസും ഡാൻസാഫ് സംഘവും സംയുക്തമായി പരിശോധന നടത്തുന്നതിനിടെയാണ് നാടകീയ രംഗങ്ങൾ അരങ്ങേറിയത്. പോലീസിനെ കണ്ടയുടൻ പ്രതികൾ സഞ്ചരിച്ചിരുന്ന കാർ ഉപേക്ഷിച്ച് അനന്ദുവും കീർത്തനയും ഓടി രക്ഷപ്പെടുകയായിരുന്നു.
തുടർന്ന് പോലീസ് നടത്തിയ വിശദമായ പരിശോധനയിൽ ഇവർ സഞ്ചരിച്ച കാറിൽ നിന്നും 7 ഗ്രാം എംഡിഎംഎ ലഹരിമരുന്ന് കണ്ടെടുത്തു. പ്രതികൾ ഉപയോഗിച്ച കാർ നിലവിൽ പോലീസ് കസ്റ്റഡിയിലാണ്.
നഗരത്തിൽ മുറികൾ വാടകയ്ക്കെടുത്ത് യുവതീയുവാക്കളെ ആകർഷിച്ച് എംഡിഎംഎ വിൽപ്പന നടത്തുന്നതായിരുന്നു പിടിയിലാകാനുള്ള പ്രതികളുടെ പ്രധാന രീതി എന്ന് പോലീസ് വ്യക്തമാക്കുന്നു. ഇതിൽ കീർത്തനയ്ക്കാണ് വിപണന ശൃംഖലയിൽ പ്രധാന പങ്കുണ്ടായിരുന്നത്.
തുടർന്ന് ഇവർ താമസിച്ചിരുന്ന വാടകമുറികളിൽ പോലീസ് നടത്തിയ പരിശോധനയിൽ നിർണായക തെളിവുകൾ ലഭിച്ചു:
ലഹരി വിൽപ്പനയ്ക്ക് ഉപയോഗിച്ച 3 മൊബൈൽ ഫോണുകൾ, മയക്കുമരുന്ന് അളക്കാൻ ഉപയോഗിക്കുന്ന ഇലക്ട്രോണിക് ത്രാസ്,
വിൽപ്പനയിലൂടെ ലഭിച്ചതെന്ന് കരുതുന്ന 85,100 രൂപ
കുറച്ചുനാളുകളായി ഇരുവരും ഡാൻസാഫ് സംഘത്തിന്റെ കർശന നിരീക്ഷണത്തിലായിരുന്നു. ലഹരിമരുന്നിന്റെ ഉറവിടം കണ്ടെത്താനും ഒളിവിൽ പോയ പ്രതികളെ ഉടൻ പിടികൂടാനുമുള്ള ശ്രമത്തിലാണ് കോഴിക്കോട് സിറ്റി പോലീസ്.
