കോഴിക്കോട്: സംസ്ഥാനത്ത് സ്വർണവില വീണ്ടും താഴോട്ട്. 1,11,240 രൂപയാണ് ഒരു പവന് സ്വര്ണത്തിന്റെ വില. ഗ്രാമിന് ആനുപാതികമായി 95 രൂപയാണ് കുറഞ്ഞത്. 13,905 രൂപയാണ് ഒരു ഗ്രാം സ്വര്ണത്തിന്റെ വില. അന്താരാഷ്ട്ര വിപണിയിൽ സ്വർണ വിലയിൽ ഉണ്ടായ ഇടിവാണ് കേരളത്തിലെ വിലയെ പ്രധാനമായും ബാധിച്ചത്.
രാജ്യാന്തര വിപണിയിൽ സ്വർണത്തിന്റെ ഡിമാൻഡിൽ വന്ന കുറവ് ആഭ്യന്തര വിപണിയിലും പ്രതിഫലിക്കുന്നു. അന്താരാഷ്ട്ര വിപണിയിൽ യു.എസ് ഡോളർ കൂടുതൽ കരുത്താർജ്ജിക്കുകയും ബോണ്ട് യീൽഡ് വർധിക്കുകയും ചെയ്തത് സുരക്ഷിത നിക്ഷേപമെന്ന നിലയിൽ സ്വർണത്തോടുള്ള നിക്ഷേപകരുടെ താൽപര്യം കുറച്ചു.
ഡോളറിന്റെ മൂല്യം കൂടുമ്പോൾ സ്വർണം വാങ്ങുന്നവർക്ക് ചിലവ് കൂടുന്നതിനാൽ ഡിമാൻഡ് കുറയാൻ കാരണമാകും. പശ്ചിമേഷ്യയിലെ സംഘർഷങ്ങൾ അന്താരാഷ്ട്ര വിപണിയിൽ എണ്ണവിലയെയും സ്വർണ്ണവിലയെയും വലിയ തോതിൽ സ്വാധീനിക്കുന്നുണ്ട്.
അസംസ്കൃത എണ്ണവിലയിലുണ്ടാകുന്ന വ്യതിയാനങ്ങൾ പണപ്പെരുപ്പത്തെയും പലിശനിരക്കിനെയും സ്വാധീനിക്കുന്നു. ഇത് പരോക്ഷമായി സ്വർണത്തിന്റെ വിപണി മൂല്യത്തെയും ബാധിക്കുന്നു.
മേയ് മാസത്തിൽ സ്വർണ്ണ ഇറക്കുമതി തീരുവയിൽ കേന്ദ്ര സർക്കാർ വരുത്തിയ വർധനവ് സ്വർണത്തിന്റെ ആഭ്യന്തര ഡിമാൻഡിനെ ഗണ്യമായി കുറച്ചിട്ടുണ്ട്. ഇത് വിപണിയിലെ വില സമ്മർദ്ദത്തെ സ്വാധീനിക്കുന്നു. നിക്ഷേപകർ അന്താരാഷ്ട്ര തലത്തിലുള്ള സാമ്പത്തിക വിവരങ്ങളും പശ്ചിമേഷ്യൻ സാഹചര്യങ്ങളും നിരീക്ഷിച്ചുകൊണ്ടിരിക്കുകയാണ്, ഇത് സ്വർണവിലയിൽ വരും ദിവസങ്ങളിലും ചാഞ്ചാട്ടമുണ്ടാക്കാൻ സാധ്യതയുണ്ട്.
