റിയാദ്: വിശുദ്ധ നഗരങ്ങളായ മക്കയെയും മദീനയെയും ലക്ഷ്യമാക്കി ഹൂതികൾ നടത്തിയ ആക്രമണശ്രമം സൗദി പ്രതിരോധ സേന പരാജയപ്പെടുത്തി. രണ്ട് ബാലിസ്റ്റിക് മിസൈലുകൾ സൗദി വ്യോമ പ്രതിരോധ സംവിധാനം ഉപയോഗിച്ച് തകർത്തു. മിസൈലുകളുടെ അവശിഷ്ടങ്ങൾ മക്ക, ജിദ്ദ, തായിഫ്, റാബിഗ് മേഖലകളിൽ പതിച്ചു.
ഇന്ന് പുലർച്ചെ മുതലാണ് ആക്രമണങ്ങൾ നടന്നത്. കിഴക്കൻ പ്രവിശ്യയിലേക്ക് വന്ന ഡ്രോണും റിയാദ് ലക്ഷ്യമാക്കി വന്ന ബാലിസ്റ്റിക് മിസൈലും പുലർച്ചെ തന്നെ സേന തകർത്തിരുന്നു. പിന്നാലെ ഉച്ചയോടെ തായിഫ്, യാൻബു നഗരങ്ങൾക്ക് നേരെ വന്ന രണ്ട് മിസൈലുകൾ കൂടി വെടിവെച്ചിട്ടതായി സഖ്യസേന വക്താവ് തുർക്കി അൽ മാലികി അറിയിച്ചു.
ആക്രമണ മുന്നറിയിപ്പിനെ തുടർന്ന് മക്ക, ജിദ്ദ, തായിഫ്, യാൻബു പ്രദേശങ്ങളിൽ ജാഗ്രതാ നിർദേശം നൽകിയിരുന്നു.
അതേസമയം, ആക്രമണങ്ങളുടെ പശ്ചാത്തലത്തിൽ സൗദിയിലേക്കുള്ള വിമാന സർവീസുകൾ റദ്ദാക്കുന്നത് ഇന്ത്യൻ വിമാനക്കമ്പനികൾ നീട്ടി. അകാസ എയർ റിയാദിലേക്കുള്ള വിമാനങ്ങൾ നവംബർ 30 വരെയും ജിദ്ദയിലേക്കുള്ളവ നവംബർ 10 വരെയും റദ്ദാക്കി. ഇൻഡിഗോ റിയാദ്, ജിദ്ദ, മദീന, ദമ്മാം സർവീസുകൾ ഒക്ടോബർ 31 വരെ നിർത്തിവെച്ചതായും അറിയിച്ചു.
വിമാന സർവീസുകൾ മുടങ്ങിയതോടെ സൗദിയിലേക്ക് മടങ്ങാനിരിക്കുന്നവരുടെയും നാട്ടിലേക്ക് പോകാനിരിക്കുന്ന പ്രവാസികളുടെയും യാത്ര അനിശ്ചിതത്വത്തിലായി.
