ശ്രീഹരിക്കോട്ട: തിളക്കമാർന്ന വിജയത്തോടെ ബഹിരാകാശത്ത് വൻ തിരിച്ചുവരവ് നടത്തി ഐഎസ്ആർഒ. അത്യാധുനിക ഭൗമനിരീക്ഷണ ഉപഗ്രഹമായ ഇഒഎസ്-05 (EOS-05) വഹിച്ചുകൊണ്ടുള്ള ജിഎസ്എൽവി എഫ്-17 റോക്കറ്റ് ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്ന് വിജയകരമായി വിക്ഷേപിച്ചു. സെപ്റ്റംബർ 4-ന് പുലർച്ചെ 2:55-നായിരുന്നു വിക്ഷേപണം.
27.5 മണിക്കൂർ നീണ്ട കൗണ്ട്ഡൗണിനൊടുവിലാണ് ജിഎസ്എൽവി സീരീസിലെ 19-ാം ദൗത്യം ലക്ഷ്യസ്ഥാനത്തേക്ക് കുതിച്ചുയർന്നത്. ഭൂസ്ഥിര പരിക്രമണപഥത്തിൽ നിന്ന് ഇന്ത്യൻ ഉപഭൂഖണ്ഡത്തെ മുഴുവൻ സമയവും നിരീക്ഷിക്കുക, രാജ്യസുരക്ഷയ്ക്കും ദുരന്തനിവാരണ പ്രവർത്തനങ്ങൾക്കും വിവരങ്ങൾ ലഭ്യമാക്കുക എന്നിവയാണ് 2367 കിലോഗ്രാം ഭാരമുള്ള ജിഎസ്എൽവി എഫ്-17 റോക്കറ്റിന്റെ പ്രധാന ദൗത്യം.
ഉപഗ്രഹത്തെ ജിയോ ട്രാൻസ്ഫർ ഓർബിറ്റിന് തൊട്ടുതാഴെയുള്ള സ്ഥാനത്താണ് റോക്കറ്റ് വേർപെടുത്തിയത്. ഇനി അവിടെനിന്ന് സ്വന്തം പ്രൊപ്പൽഷൻ സംവിധാനം ഉപയോഗിച്ചാണ് ഉപഗ്രഹം ലക്ഷ്യമിട്ട ഭ്രമണപഥത്തിലേക്ക് എത്തുക.
2021 ഓഗസ്റ്റ് 12-ന് നടന്ന ജിഎസ്എൽവി എഫ്-10 ദൗത്യം പരാജയപ്പെട്ടതിനെത്തുടർന്ന്, തകർന്ന ഉപഗ്രഹത്തിന് പകരമായി നിർമ്മിച്ചതാണ് പുത്തൻ പേടകം. ജനുവരിയിൽ നടന്ന പിഎസ്എൽവി സി-62 ദൗത്യത്തിന്റെ പരാജയത്തിന് ശേഷം ഐഎസ്ആർഒ നടത്തുന്ന ആദ്യ വിക്ഷേപണമാണിത്.
