കൊല്ലം: ഹയര് സെക്കന്ഡറി പരീക്ഷാഫലം പ്രഖ്യാപിക്കുന്നത് വൈകാന് സാധ്യത. മെയ് 22ന് ഫലം പ്രസിദ്ധീകരിക്കാനായിരുന്നു നേരത്തെ തീരുമാനിച്ചിരുന്നത്. എന്നാല് നടപടികള് പൂര്ത്തിയാക്കാന് കഴിയാത്തതിനാല് മെയ് 26ലേക്ക് നീട്ടാനാണ് അധികൃതരുടെ ആലോചന.
പരീക്ഷാഫലം വൈകുന്നതിന് പ്രധാനമായും രണ്ട് കാരണങ്ങളാണ് ചൂണ്ടിക്കാണിക്കപ്പെടുന്നത്. ഒന്നാമതായി, അധ്യാപകര് മൂല്യനിര്ണയ ക്യാംപുകളില് നിന്ന് വിട്ടുനിന്നത് വലിയ പ്രതിസന്ധി സൃഷ്ടിച്ചു. മൂല്യനിര്ണയത്തില് നിന്ന് ഏകദേശം 2,177 അധ്യാപകര് വിട്ടുനിന്ന സാഹചര്യത്തില്, അവര്ക്കെതിരെ കര്ശന അച്ചടക്ക നടപടികള് സ്വീകരിക്കുമെന്ന് പൊതുവിദ്യാഭ്യാസ വകുപ്പ് മുന്നറിയിപ്പ് നല്കിയിരുന്നു.
രണ്ടാമതായി, ലോക്സഭാ തെരഞ്ഞെടുപ്പ് കാരണം മൂല്യനിര്ണയ ക്യാംപുകള് ആരംഭിക്കുന്നതിലുണ്ടായ കാലതാമസമാണ്. സാധാരണ ഏപ്രില് ആദ്യ വാരം ആരംഭിക്കാറുള്ള ക്യാംപുകള്, തെരഞ്ഞെടുപ്പ് തിരക്കുകള് കാരണം ഏപ്രില് 16ന് മാത്രമാണ് ആരംഭിക്കാന് സാധിച്ചത്. ഈ സാഹചര്യം ഫലപ്രഖ്യാപനത്തെ നേരിട്ട് ബാധിക്കുകയായിരുന്നു.
