റിയാദ്: യെമനിലെ ഹൂതി കേന്ദ്രങ്ങൾ ലക്ഷ്യമിട്ട് സൗദി സഖ്യസേന ശക്തമായ വ്യോമാക്രമണം നടത്തി. ഹൂതികളുടെ 136 സൈനിക കേന്ദ്രങ്ങളാണ് സഖ്യസേന തകർത്തത്. ഹൂതികളുടെ ബാലസ്റ്റിക് മിസൈൽ ശൃംഖല പൂർണ്ണമായി തകർക്കുകയാണ് ഈ ആക്രമണങ്ങളുടെ പ്രധാന ലക്ഷ്യമെന്ന് അധികൃതർ വ്യക്തമാക്കി.
യെമനിലെ ചെങ്കടൽ തീരത്തുള്ള തന്ത്രപ്രധാന പ്രദേശങ്ങൾ പിടിച്ചെടുത്തതിന് പുറമെ, ലോകത്തിലെ ഏറ്റവും വലിയ ക്രൂഡ് ഓയിൽ കയറ്റുമതിക്കാരായ സൗദി അറേബ്യയിലെ ഗതാഗത കേന്ദ്രങ്ങൾ, എണ്ണ ശുദ്ധീകരണ ശാലകൾ, സാധാരണക്കാരുടെവാസസ്ഥലങ്ങൾ എന്നിവയ്ക്കുനേരെയും ഹൂതികൾ തുടർച്ചയായി ഡ്രോൺ, മിസൈൽ ആക്രമണങ്ങൾ നടത്തിയിരുന്നു.
റിയാദ് അന്താരാഷ്ട്ര വിമാനത്താവളത്തിനുനേരെയുണ്ടായ ആക്രമണത്തിൽ മൂന്ന് പേർ കൊല്ലപ്പെട്ടതായി സൗദി അറേബ്യ ഔദ്യോഗികമായി അറിയിച്ചിരുന്നു. റിയാദ് വിമാനത്താവളത്തിൽ ആക്രമണം നടത്തിയത് തങ്ങളാണെന്ന് ഹൂതികളും അവകാശപ്പെട്ടിരുന്നു. ഇതിന് മറുപടിയായാണ് യെമന്റെ തലസ്ഥാനമായ സനയിലെ വിമാനത്താവളത്തിന് നേരെ സൗദി സഖ്യസേന ആക്രമണം നടത്തിയതും, ഇതിൽ രണ്ട് പേർ കൊല്ലപ്പെട്ടതായി ഹൂതി മാധ്യമങ്ങൾ റിപ്പോർട്ട് ചെയ്തതും.
ആഗോള കപ്പൽ ഗതാഗതത്തിന് അതീവ നിർണായകമായ ബാബ് അൽ-മന്ദബ് കടലിടുക്കിന് ചുറ്റുമുള്ള പ്രദേശങ്ങൾ തിരിച്ചുപിടിക്കാൻ ലക്ഷ്യമിട്ട് വിവിധ പ്രത്യാക്രമണങ്ങൾ നടത്തിയിട്ടും, ഹൂതികളുടെ മുന്നേറ്റം പൂർണ്ണമായി തടയാനോ അവർ പിടിച്ചെടുത്ത പ്രദേശങ്ങൾ തിരിച്ചുപിടിക്കാനോ സൗദി അറേബ്യയ്ക്കും യെമൻ സർക്കാർ സേനയ്ക്കും ഇതുവരെ സാധിച്ചിട്ടില്ലെന്നാണ് നിലവിലെ റിപ്പോർട്ടുകൾ സൂചിപ്പിക്കുന്നത്.
