വടകര: കോഴിക്കോട് ജില്ലാ സ്കൂൾ ശാസ്ത്രോത്സവത്തിന് നാളെ (വ്യാഴാഴ്ച) വടകരയിൽ തുടക്കമാകും. വ്യാഴം, വെള്ളി, ശനി ദിവസങ്ങളിലായി മൂന്ന് ദിവസം നീണ്ടുനിൽക്കുന്ന മേളയിൽ ജില്ലയിലെ വിവിധ സ്കൂളുകളിൽ നിന്നായി നാലായിരത്തിലേറെ വിദ്യാർഥികൾ പങ്കെടുക്കും. 171 ഇനങ്ങളിലായാണ് മത്സരങ്ങൾ അരങ്ങേറുന്നത്. ജില്ലാ വിദ്യാഭ്യാസ വകുപ്പിന്റെ നേതൃത്വത്തിൽ വടകര നഗരത്തിലെ അഞ്ച് സ്കൂളുകളിലും നഗരസഭാ ടൗൺഹാളിലുമായാണ് ശാസ്ത്രോത്സവം സംഘടിപ്പിക്കുന്നത്.
മത്സരാർഥികൾക്കുള്ള രജിസ്ട്രേഷൻ വ്യാഴം പകൽ രണ്ടുമുതൽ വടകര സെന്റ് ആന്റണീസ് ഹൈസ്കൂളിൽ ആരംഭിക്കും. വെള്ളി രാവിലെ ഒമ്പതരക്ക് സെന്റ് ആന്റണീസ് ഹൈസ്കൂളിൽ പാറക്കൽ അബ്ദുള്ള എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്റ് കോട്ടയിൽ രാധാകൃഷ്ണൻ അധ്യക്ഷനാകും.
വെള്ളിയാഴ്ചയും ശനിയാഴ്ചയുമായി വിവിധ വേദികളിൽ മത്സരങ്ങൾ നടക്കും. പുതുപ്പണം ജെഎൻഎം ഗവ. ഹയർ സെക്കൻഡറി സ്കൂളിൽ ഗണിതശാസ്ത്രമേളയും എംയുഎം ഹയർ സെക്കൻഡറി സ്കൂളിൽ ശാസ്ത്രമേളയും സെന്റ് ആന്റണീസ് ഗേൾസ് ഹൈസ്കൂളിൽ പ്രവൃത്തിപരിചയമേളയും നടക്കും. ബിഇഎം ഹയർ സെക്കൻഡറി സ്കൂളിലാണ് ഐടി മേള. വടകര നഗരസഭാ ടൗൺഹാളിൽ വൊക്കേഷണൽ എക്സ്പോയും സ്കിൽ ഫെസ്റ്റിവലും സംഘടിപ്പിക്കും. എല്ലാ വേദികളിലും രാവിലെ 9.30ന് മത്സരങ്ങൾ ആരംഭിക്കും.
ശാസ്ത്രോത്സവത്തിന്റെ ഭാഗമായി സംഘടിപ്പിച്ച ശാസ്ത്രനാടക മത്സരത്തിൽ മേമുണ്ട ഹയർ സെക്കൻഡറി സ്കൂൾ അവതരിപ്പിച്ച 'വണ്ടി' ഒന്നാംസ്ഥാനം നേടി. എ ഗ്രേഡും നേടിയ നാടകം സംസ്ഥാനതല മത്സരത്തിലേക്ക് തിരഞ്ഞെടുക്കപ്പെട്ടു. കോഴിക്കോട് പ്രൊവിഡൻസ് ഹയർ സെക്കൻഡറി സ്കൂൾ അവതരിപ്പിച്ച 'തൊണ്ട' നാടകത്തിനാണ് രണ്ടാംസ്ഥാനം.
ശനിയാഴ്ച വൈകിട്ട് ആറിന് സെന്റ് ആന്റണീസ് ഹൈസ്കൂളിൽ നടക്കുന്ന സമാപന സമ്മേളനം കെ.കെ. രമ എംഎൽഎ ഉദ്ഘാടനം ചെയ്യും. മൂന്ന് ദിവസങ്ങളിലായി നടക്കുന്ന മത്സരങ്ങൾക്കും പ്രദർശനങ്ങൾക്കും ശനിയാഴ്ചയോടെ തിരശ്ശീല വീഴും.
